«Ак Барс» хоккейчылары Екатеринбургта оттырды, киләсе уен Казанда узачак

Бүген «Ак Барс» хоккейчылары плей-офф этабының икенче уенында «Автомобилист» командасына 3:4 исәбе белән җиңелде. Матч Екатеринбургта узды.

• Плей-оффта командалар дүрт җиңүгә кадәр көч сынаша. Дүрт тапкыр җиңгән команда киләсе турга үтә, ә җиңелгәне Гагарин Кубогы өчен көрәштән төшеп кала. «Ак Барс» узган уенда җиңгән иде, хәзер ике команда исәбендә дә берәр җиңү.
  Новости СМИ2

Беренче периодның уникенче минутында исәп «Автомобилист» файдасына ачылды, гол авторы – Александр Шаров (1:0). Периодның соңгы минутында, «Автомобилист» күпчелектә уйнаганда Ник Меркли гол кертте (2:0).

Икенче периодның дүртенче минутында Брукс Мэйсек «Ак Барс» капкасына өченче алканы кертте, әлеге гол да Казан командасы азчылыкта уйнаганда керде (3:0). Унынчы минутта «Ак Барс» сакчысы Степан Фальковский команданың артка калышуын киметә алды (3:1).

Өченче периодның дүртенче минутында «Ак Барс» һөҗүмчесе Кирилл Семёнов гол кертте (3:2). Алтынчы минутта «Автомобилист» уенчысы Алексей Бывальцев исәпне үзгәртте (4:2). Җиденче минутта, «Ак Барс» күпчелектә уйнаганда, команда капитаны Дмитрий Яшкин гол кертте (4:3).

Командалар составы:

«Автомобилист»

• Аликин (Галкин);
• Денежкин – Да Коста – Голышев, Трямкин – Осипов;
• Кизимов – Шаров – Мэйсек, Воробьёв – Диц;
• Хрипунов – Бывалцев – Меркли, Зборовский – Кашников;
• Шашков – Романцев – Каштанов, Блэкер – Ишимников.

«Ак Барс»

• Билалов (Мифтахов);
• Барабанов – Сафонов – Галимов, Лямкин – Марченко;
• Петан – Семёнов – Яшкин, Фальковский – Миллер;
• Пустоёров – О’Делл – Коршков, Яруллин – Князев;
• Дыняк – Кателевский – Кошелев (Җамалтдинов), Ст.Терехов.

«Ак Барс»ның киләсе уены Казанда «Татнефть Арена» боз сараенда узачак. «Ак Барс» – «Автомобилист» матчы 30 март көнне 17:00 сәгатьтә башлана.