Альфред Дәүләтшин: Татарны Уфасыз, Уфаны татарсыз күз алдына китереп булмый

Бөтендөнья татар конгрессының Башкортстандагы вәкиле Альфред Дәүләтшин – «Татарны Уфасыз, Уфаны татарсыз күз алдына китереп булмый», – дип белдерде. Бу хакта ул бүген Уфада заманча форматта узган «Ufa.Tatar» форумында әйтте.

«Сезне күрүебезгә шатбыз, быел «Ufa.Tatar» форумын икенче тапкыр уздырабыз. Әлбәттә, татарны Уфасыз, Уфаны татарсыз күз алдына китереп булмый.

Бүген төрле фикерләр яңгырар, бүгенге форум продуктив узар һәм дәвамлы булыр дип ышанам», – диде ул.

Форумда Казан һәм Уфаның танылган сәнгать, җәмәгатьчелек һәм мәгариф эшлеклеләре катнаша.

«Ufa.Tatar» форумында татар милләтенең заманча чагылышы, урбанизация чорында телнең һәм мәдәниятнең саклануы һәм үсеше турында дисскусияләр үза.

Шулай ук кунакларга Татарстан һәм Башкортстанның милли брендларыннан киемнәр, татар газета-журналлары, китаплар тәкъдим ителә.