Татарстанда язылган Коръән кулъязмасы 2026 елда басылып чыгарга мөмкин. Бу хакта Татарстан мөфтие Камил хәзрәт Сәмигуллин республика Министрлар Кабинетында узган брифингтан соң «Татар-информ» хәбәрчесе Динара Прокопьева соравына җавап биргәндә хәбәр итте.
«Ул әзер, ләкин тагын бер кат тикшерергә кирәк.
Аннары без башка илләрдәге белгечләргә мөрәҗәгать итәрбез, бәлки, стандартларга туры килү сертификатыннан тыш, алардан да сертификатлар алырбыз. Шуннан соң басмага әзерләячәкбез. Киләсе елга без аны бастырып чыгарачакбыз дип әйтәм. Ашыксак, нәрсәнедер күрми дә калырга мөмкин», - диде ТР мөфтие Коръән кулъязмасы әзерләү турында.Ул искәрткәнчә, эш 2022 ел башында ук башланды, хәзер комиссия укый, аның составына унике кеше керә.
«Без аны яздык, хәзер тикшерү бара. Кулъязма хезмәт – бу бик катлаулы, без аны өч ел яздык. Бу хаталар ясарга ярамый торган китап», – дип йомгаклады Камил Сәмигуллин.
Искәртик, Казан 2026 елда ислам дөньясының мәдәни башкаласы булачак. Коръән кулъязмасы презентациясен шушы вакыйгага багышларга мөмкиннәр.
Свежие комментарии