Актанышның 1нче мәктәбенең 7 сыйныф укучысы Замирә Галиева бүген кулына шәхесне раслаучы төп документ алгач, куанычын яшерми. «Паспорт алгач, үземне Россиянең чын гражданы итеп хис иттем», – ди кыз. 12 июнь, Россия көне алдыннан, районның тантаналар залына Замирә әнисе Зилә, әтисе Илнур белән килгән.
Бу хакта «Актаныш» сайтында Ләйсән Газизова яза.Замирә һәм аның әти-әнисе кебек Актаныш районының тагын 15 егет һәм кызы, аларның якыннары дулкынландыргыч мизгелләр кичерде.
Шәхесне раслаучы төп документны укучыларга Актаныш районы башлыгы Ленар Зарипов, махсус хәрби операция һәм Чечня сугышы ветераны Илсур Зәкиев, РФ Эчке эшләр министрлыгының Актаныш районы буенча бүлеге җитәкчесе Марат Мингазов, район ЗАГС бүлеге башлыгы Гөлфинә Мөхәммәдиева тапшырды.
Күренекле шәхесләрнең изге теләкләре балаларга киләчәккә наказ булып яңгырады. Ленар Зарипов яшьләргә туган илебезнең Россия, Татарстан, кече Ватаныбыз - Актаныш районының лаеклы шәхесләре булып өлгереп җитүләрен теләде.
Илсур Зәкиев балаларга паспорт алгач, хокукларыгыз белән бурычларыгызның да артуын искәртте, илебезнең яшь гражданнарына багышлап үзе язган шигырен укыды. Гөлфинә Мөхәммәдиева ЗАГС бүлеге тарафыннан үткәрелә торган башка бәйрәмнәрдә дә катнашырга язсын дигән фикерен җиткерде.
Тантаналы чараны «Бердәм Россия» партиясенең Актаныш җирле бүлекчәсенең башкарма сәркатибе Зәһинә Исламова белән «Алдынгылар хәрәкәте» җитәкчесе Рәмис Хәсәнов алып барды.
Әлфия Авзалова исемендәге район мәдәният сараеның иҗат коллективы патриотик рухтагы чыгышлары белән тантаналы чарага тагы да бер ямь өстәде.
Читайте нас:
Дзен - https://dzen.ru/tatar-inform.ru
ВК - https://vk.com/tatarinform
Телеграм - https://t.me/iatatarinform
Свежие комментарии