Татарстанда «Алтын битлек»кә бердәнбер номинациядә бер спектакль дәгъва кыла

2023-2024 еллар сезонында Россиянең «Алтын битлек» театраль премиясенә Татарстаннан бер генә спектакль дәгъва кыла.

В.И.Качалов исемендәге Казан академия рус Зур драма театрының «Гамлет» спектакле «Иң яхшы ир-ат роле. Драма театры» категориясендә тәкъдим ителгән. Бүләкне Клавдий ролен башкарган Илья Славутский дәгъвалый.

Премияне дәгъвалаучылардан барлыгы 734 гариза килгән, шуларның 567сенә катнашу хокукы бирелгән. Өч номинациядә («Иң яхшы дирижер эше. Оперетта/мюзикл», «Иң яхшы ир-ат роле. Оперетта/мюзикл» һәм «Иң яхшы дирижер эше. Балет») җиңүгә дәгъва кылучылар күрсәтелмәгән.

Шул ук вакытта, узган сезонда Татарстан театрлары берьюлы алты «Алтын битлек» яулаган иде. Камал театрында куелган «Болганчык еллар. Мөһаҗирләр» спектакле – ике, «Әкият» Курчак театрының «Авиатор» спектакле өч бүләк алды. Кариев исемендәге Казан татар дәүләт яшь тамашачы театрының «Рөстәм маҗаралары» спектакле махсус призга лаек булды.

«Алтын битлек» премиясен тапшыру тантанасы быелның җәендә Казанда – Г.Камал театрының яңа бинасында узачак.