<p>Су спорт төрләре сараенда Россиянең иң көчле сикерүчеләре, шулай ук башка ил спортчылары чыгыш ясаячак. Дүшәмбе көнне 10 метрлы биеклектән сикерү ярышлары уза, анда Россияне Европа чемпионы<strong> Никита Шлейхер</strong> һәм Олимпия уеннары призеры <strong>Александр Бондарь</strong>, Европа чемпионы <strong>Юлия Тимошинина</strong> һәм <strong>Виктория Казанцева</strong> тәкъдим итәчәк.
</p> <p>Шулай ук Европа чемпионаты җиңүчесе<strong> Ульяна Клюева</strong> һәм <strong>Надежда Трифонова</strong>, Бразилия, Венесуэла, Үзбәкстан һәм башка илләр спортчылары өч метрлы трамплиннан сикерү осталыгын күрсәтәчәк. Бу турыда «Татар-информ» яза.</p> <p>Баскет-холлда, Казан УНИКСының үз аренасында, баскетбол буенча ике төрле ярышның плей-оффында катнашучылар билгеләнә, анда спортчылар башта приставкада симулятор уйный, аннары реаль мәйданчыкка чыга. Бу вакытта җыелган очколар кушыла. БРИКС уеннарында 3кә 3 ярышында Россия баскетбол җыелма командасының төп составы, Сербия, Бразилия, Беларусь, Колумбия, Үзбәкстан командалары һ.б. чыгыш ясый. Матч 11.30 сәгатьтә башлана.</p> <p>«Ак Барс» көрәш сараенда көрәшчеләр үз чыгышларын башлап җибәрә. Дүшәмбе көнне ир-атлар арасныда 10 үлчәү категориясендә беренчел ярышлар һәм ярымфиналлар уза. Көрәш 11.00 сәгатьтә башлана. Турнирда катнашучылар арасында дөнья һәм Европа чемпионы <strong>Абасгаджи Магомедов</strong>, Европа чемпионы <strong>Корбан Шираев</strong>, Европа чемпионаты призеры <strong>Али Рахимзаде</strong> (Азәрбайҗан) һәм башкалар бар.</p> <p>Тамашачыларны мәдәни программа көтә. Барлык объектларда аниматорлар эшли. Шулай ук Баскет-холлда һәм Көрәш сараенда БРИКС Уеннарының фирма атрибутикасын, ярышларның талисманы леопард Бриксик йомшак уенчыгын сатып алырга мөмкин.</p>
Свежие комментарии