Татарстанда Казан Кремленең ике тарихи манарасында – Тайник (яшеренү) һәм Консистор - реставрация эшләре төгәлләнде. Аларның һәркайсы республиканың архитектура мирасында мөһим роль уйный.
1556-1562 елларда төзелгән Тайник манарасы Кремльнең сакланып калган иң борынгы оборона корылмаларыннан берсе санала.
Ул ак таштан салынган диварлар барлыкка килгәнче үк кирмәнгә төп керү урыны булып хезмәт иткән. Манараның атамасы шартлау нәтиҗәсендә юк ителгән чыганакка җир астыннан керү юлы белән бәйле. Реставрация барышында корылманың диварлары һәм капкалары буялган, бу аларның тарихи күренешен кире кайтарган.XVI гасыр ахыры - XVII гасыр башында төзелгән Консистор манарасына да масштаблы реставрация ясалган. Эшчеләр аның фундаментын ныгыткан, гидроизоляция үткәргән, кирпеч конструкцияне торгызган һәм җөйләрен өлешчә ремонтлаган.
Казан Кремлен төзекләндерү эшләре дәвам итәчәк: 2025 елда Спас, Көньяк-Көнбатыш, Преображенск, Биш кырлы, Исемсез һәм Төньяк-Көнбатыш манаралары арасындагы берничә участокны реставрацияләү ниятләнә. Кирмән диварларын җимерелүдән саклаячак такта түбәне яңартуга аерым игътибар бирәчәкләр.
ТР Мәдәни мирас объектларын саклау комитеты рәисе Иван Гущин билгеләп үткәнчә, реставрация – Казан Кремленең уникаль архитектура ансамблен (аны төзү эшләре 1556 елда Псковның атаклы архитекторлары Постник Яковлев һәм Иван Ширяй җитәкчелегендә башлана) саклау буенча масштаблы программаның бер өлеше.
Свежие комментарии