Политика

Рөстәм Миңнеханов «Белем» мәгариф музее ачылышында: Бу - укытучыларыбызга зур хөрмәт

КФУның Филология һәм мәдәниятара багланышлар институтында «Белем» Татарстан Республикасы мәгариф музее ачылу тантанасы булды.

Кунакларны Әлифбага багышланган җыр белән конкурслар лауреаты Рөстәм Хөсәенов каршы алды.

«Чын күңелдән зур тантана белән котлыйм. 2023 елда әлеге музейны әзерләргә, ачарга карар кылган идек.

Музейда тарихыбызны да күрсәтәбез, безнең укытучыларның республика үсешенә керткән хезмәтен дә күрсәтәбез. Ул тарихыбыз, традицияләребез, династияләребезгә нигезләнә. Урыны да укытучылар, педагоглар әзерли торган үзәктә урнашкан. Бу музейның булдырылуы - укытучыларыбызга бик зур хөрмәт», - диде Рөстәм Миңнеханов музей ачылышында.

Аның фикеренчә, укытучы профессиясенең престижын күтәрергә кирәк. «Мәктәпкәчә яшьтәге балалар учреждениесе, мәктәп, техникум, колледж, югары уку йортлары... Һәр педагог безнең киләчәкне формалаштыра. Барыгызны да әлеге вакыйга белән котлыйм», - диде Татарстан Рәисе.

Тантанада шулай ук Татарстан Республикасы Дәүләт Советы Рәисе урынбасары Марат Әхмәтов, Татарстан Республикасы Премьер-министры урынбасары Ләйлә Фазлыева, Татарстан Республикасы Мәгариф һәм фән министры Илсур Һадиуллин, институт директоры Рәдиф Җамалетдинов катнашты.

Төп экспозиция берничә бүлектән тора. Беренче бүлек татар халкы язуының барлыкка килүе һәм үсеше турында сөйли. Зал язу системаларының эволюциясе турында сөйләүдән башлана – төрки руника, гарәп язуы, латиницадан кириллицага кадәр. Татарларның китап нәшриятын һәм китап мәдәниятен үстерүгә зур урын бирелгән.

Килүчеләргә гарәп графикасындагы кулъязмалар, гарәп, латин һәм кириллицадагы басмалар тәкъдим ителә.

Аерым витрина әлифбалар, дәреслекләр һәм уку әсбаплары булдыру, үстерү тарихына багышланган. Экспозициянең алдагы бүлекләрендә мәктәпкәчә яшьтән башлап республикада мәгариф тарихын – мәктәп һәм мәдрәсәләрдән башлап, республиканың заманча мәгариф системасының барлыкка килүенә һәм үсешенә кадәр тасвирлана.

Татарстан Республикасы мәгариф музее 2023 елда Татарстан Республикасында игълан ителгән педагог һәм остаз елы кысаларында педагогның абруен һәм статусын күтәрүгә ярдәм итә торган чаралар планы нигезендә эшләнгән.

Музейны төзүгә Татарстан Республикасы бюджетыннан 110 млн сум акча бүлеп бирелгән, ә аның нигезенә 1985 елда оештырылган Татарстан Республикасы халык мәгарифе музее коллекцияләре (биш меңнән артык саклау берәмлеге) салынган.