Казан федераль университеты «Интерфакс» төркеме әзерләгән университетларның XVI еллык Илкүләм рейтингында сигезенче урынны яулады.
Беренче-җиденче баскычларда урнашкан М.В.Ломоносов исемендәге Мәскәү дәүләт университетын, «МИФИ» Илкүләм тикшеренү атом-төш университеты, Мәскәү физика-техника институты, «Югары икътисад мәктәбе» фәнни-тикшеренү университеты, Новосибирск илкүләм тикшеренү дәүләт университеты, Томск дәүләт илкүләм тикшеренү университеты һәм Санкт-Петербург дәүләт университеты КФУны узып китте.
Әлеге рейтинг версиясе буенча беренче унлыкка шулай ук Россиянең беренче Президенты Б.Н.Ельцин исемендәге Урал федераль университеты һәм «МИСИС» Илкүләм тикшеренү технология университеты да керде.
Рейтингны төзүчеләр 389 югары уку йортының эшен бәяләгән. Сүз шул исәптән 29 илкүләм тикшеренү, 10 федераль һәм 33 терәк университет, шулай ук «Өстенлек 2030» программасында катнашучы 145 университет һәм дәүләтнеке булмаган 22 югары уку йорты турында бара.
Югары уку йортларының эшчәнлеге алты параметр (бренд, мәгариф, тикшеренүләр, социаль мохит, хезмәттәшлек, инновацияләр һәм эшмәкәрлек) буенча бәяләнгән. Җыелма рейтинг алты параметрдагы рейтингның арифметик нәтиҗәсеннән гыйбарәт.
Тикшеренүчеләр университетлар тәкъдим иткән анкета мәгълүматларын, югары уку йортлары үз сайтларында урнаштырган белешмәләрне, РФ Мәгариф һәм фән министрлыгы ресурсларының ачык мәгълүматларын, шулай ук «СПАРК-Интерфакс» һәм «СКАН-Интерфакс» системалары мәгълүматларын исәпкә алган.
Читайте нас:
Дзен - https://dzen.ru/tatar-inform.ru
ВК - https://vk.com/tatarinform
Телеграм - https://t. me/iatatarinform
Свежие комментарии