Владимир өлкәсе губернаторы ике районнан кешеләрне вакытлыча эвакуацияләү турында сөйләде

Кичә кич Владимир өлкәсенең Киржач һәм Меленков районнарында «куркыныч турында сигналлар» булу сәбәпле җирле халыкны вакытлыча эвакуацияләделәр, ләкин инде төнлә алар өйләренә кире кайтты. Бу хакта төбәк җитәкчесе Александр Авдеев Telegram-каналында сөйләде.

«Төбәкнең куркыныч турындагы сигналларга реакциясе оператив булды.

Кичәге көннән бирле өлкә Хөкүмәте, муниципалитетлары, барлык профильле ведомстволары һәм хезмәтләре халыкның иминлеген тәэмин итү өчен кирәкле чаралар күрүгә әзерлек режимында эшләде», — дип белдерде губернатор.

«Киржач һәм Меленков районнарында кешеләрне эвакуацияләү буенча чаралар үткәрелде. Төнлә бөтен гражданнар өйләренә кире кайтты. Төбәктәге вәзгыять контрольдә тотыла», - дип ышандырды ул, кичәге куркынычларның нинди характерда булуын берничек тә конкретлаштырмыйча.

Киржач районы администрациясе, үз чиратында, 22 сентябрьгә каршы төндә «куркыныч турында сигнал» булу сәбәпле «Барсово, Мирный бистәләре һәм Дубки торак пунктында яшәүчеләрне» эвакуацияләү турында хисап бирде. Хәбәр барлыкка килгәндә алар инде өйләренә кире кайткан, чөнки ул вакытка «тормышка куркыныч янамаган».

Эвакуация дәвам итүче махсус хәрби операция белән ничектер бәйле булган, күрәсең. Владимир өлкәсеннән Украина чигенә кадәр якынча 750 километр. 13 июньгә каршы төндә төбәктә беренче Украина дроны бәреп төшерелде. Җирле хакимият мәгълүматлары буенча, пилотсыз очучы аппарат ул вакытта Юрьев-Польский районында юк ителде.