Томскида шәһәрнең юбилее уңаеннан «420 ел бергә» дигән шигарь астында Сабан туе узачак

<p>8 июньдә Томскиның Ново-Соборная мәйданында беренче тапкыр шәһәрнең юбилее уңаеннан «420 ел бергә» дигән шигарь астында Сабан туе узачак. Бу хакта Томск өлкәсе Татар мәдәни үзәгенең «ВКонтакте» социаль челтәрендәге рәсми сәхифәсендә хәбәр ителә.</p> <p>Татар милли бәйрәме кунаклары өчен уннан артык мәйданчык эшләячәк.

</p> <p>1. Төп сәхнә. Томск шәһәре, Себер иҗат коллективлары һәм Татарстан артистлары чыгышы.</p> <p>2. Милли татар уеннары. Теләгән һәркем Ново-Соборная мәйданындагы чирәмлектә БИШ татар милли уенында осталыгын күрсәтә ала.</p> <p>Быел Томскида беренче тапкыр «Гаилә йөгереше» уза, анда ир белән хатынга бер-берсен Сабан туе стилендә бизәлгән бакча арбасына утыртып барырга тәкъдим ителәчәк. Биремне иң кыска вакытта үтәгән гаилә җиңүче була.</p> <p>3.Көрәш. Беренче тапкыр Томск Сабан туенда бөтен Себер Федераль округыннан килгән спортчылар батыр исемен яулау өчен көрәшәчәк. Баш батырны төп бүләк – тәкә көтә.</p> <p>4. Теләгән һәркем өчен фотозона.</p> <p>5. Спорт ярышлары.</p> <p>6. Әдәби зона. Сабан туе кунаклары «Китап әйләнеше»ндә катнаша һәм татар телендәге әдәбият белән таныша ала.</p> <p>7. Балалар өчен иҗат зонасы. Сабан туеның нәни кунакларына үзләрен рәссам итеп тоярга тәкъдим ителәчәк.</p> <p>8. Рәсем күргәзмәсе. Рәссамнар Томск шәһәре, татар һәм Көнчыгыш мәдәниятенә караган эшләрен күрсәтәчәк.</p> <p>9. Татар көйләре. Бәйрәм кунаклары Себер татарларының «тактада бию» традициясе белән таныша ала. </p> <p>10. Казак уен-көлкесе. Шәһәрнең 420 еллыгын бәйрәм итү кысаларында Сабан туе кунаклары казаклар мәдәнияте белән таныша алачак.</p> <p>11. Күргәзмә-сату һәм традицион татар ашлары.</p>