Мансур Җәләлетдинов: Һәрберебезнең эшчәнлеге илебезнең җиңүенә өлеш кертерлек булса иде

Татарстан мөфтиенең махсус хәрби операциядә катнашучыларга һәм аларның гаиләләренә ярдәм итү буенча урынбасары Мансур хәзрәт Җәләлетдинов Республика мөселманнары корылтае узган көннәрдә үзенең фикерләре белән уртаклаша.

«Корылтаебыз илебез һәм халкыбыз өчен катлаулы заманда – СВО – махсус хәрби операция алып барылган көннәрдә үткәрелә.

Шуңа съездыбыз карарлары да һәм һәрберебезнең мәхәллә-мәчетләрдә алып алып барылган эшчәнлеге дә илебезнең җиңүенә өлеш кертерлек булса иде.

2022 елның 24 феврале безне сайлау алдына куйды: без йә СВОда җиңеп чыгып, үзебезгә үзебез хуҗа булып яшибез йә кемнеңдер колы, уенчыгы булып яшәргә мәҗбүр ителәбез. Без – илебез мөселманнары беренче юлны сайладык һәм илебез лидеры Владимир Владимирович Путин җитәкчелегендә җиңүгә ирешергә булды. Чөнки Аллаһы Тәгаләнең Илчесе, сөекле Пәйгамбәребез Мөхәммәд әйтте: «Ватанны сөю – иманнандыр». Чыннан да, мөселманнар махсус хәрби операцияның беренче көненнән башлап илебез азатлыгын үзләрен аямыйча яклыйлар. Мөселманнарның СВОдагы мөһим роле һәм батырлыгы турында илебез Президенты да берничә мәртәбә әйтеп узды.

Татарстаныбызның Рөстәм Нургали улы җитәкчелегендә җиңүгә керткән өлеше турында күп сөйләп булыр иде. Илебез язмышы хәл ителгән регионнарда булган кеше буларак мин бер генә әйберне ышандырып әйтә алам: безнең мөселманнар Республикабызга һәм сезнең йөзгә кызыллык китерми. Безнең мөселманнар фронтта да, тылда да батырлык күрсәтә.

Узган елның сентябрендә мине, Мәрҗани мәчетендә алып барылган 40 еллык зур эш тәҗрибәмне истә тотып, Татарстан мөфтиянең махсус хәрби операция эшләре буенча урынбасары итеп билгеләделәр. Татарстан Рәисенә күрсәткән ышанычы өчен Аллаһының рәхмәте булсын.

Диния нәзарәте рәисенең СВОга ярдәм итү буенча урынбасары буларак алып барылган эш юнәлешебезнең төп максаты – Татарстан мөселманнарын махсус хәрби операция темасында берләштерү. Бу эшкә фронтка ярдәм итү дә, тылда алып барылган эшчәнлек тә керә.

СВО буенча эшне 7 юнәлештә алып барабыз.

Беренчесе. Мөселманнар һәм башка халыклар арасында гуманитар ярдәм җыеп, аны СВО алып барылган төбәкләргә илтеп тапшыру. Сентябрь аеннан башлап минем тарафтан ДНР, ЛНР төбәкләренә, Курск өлкәсенә гуманитар ярдәм, шәмнәр, маскировка челтәрләре илтеп тапшырылды.

Икенчесе. Татарстан районнары мөхтәсибәтләре белән гуманитар ярдәм җыю эшен оештыру. Аллага шөкер, мөхтәсибәтләр бу эштә актив катнаша. Ватаныбызны яклаучыларга токмач басудан башлап машиналар сатып алуга кадәр үз өлешләрен кертәләр. Алга таба шулай дәвам иттерик. Фронттагы егетләребезгә УАЗ машиналары, кием-салым, азык-төлек кирәк. Моның өчен безнең бергәләшеп ярдәм җыюыбыз кирәк.

Өченчесе. Төрле патриотик иҗтимагый оешмалар белән хезмәттәшлек итү. Хәзерге көндә без «Фонд защитников отечества», «Народный фронт» «Красный крест», «Ярдәм янәшә», «Патриоты Родины», «Общество ветеранов пограничников» һәм башка оешмалар белән уртак эш алып барабыз.

Дүртенчесе. Дин ара берләшү темасы. СВО темасында рус православ чиркәве белән тыгыз бәйләнештә торабыз. Уртак ярдәшләшү, мәдәни, спорт чаралары оештырабыз. Уртак проектларыбыз Татарстанда халыклар һәм диннәр берләмлеген тагын бер тапкыр күрсәтә.

Бишенчесе. Махсус операцияда катнашучыларны һәм аларның туганнарын кабул итәбез. Аларны күп проблемалар борчый. Мәсәлән хәбәрсез югалучылар, гарип калучылар, реабилитация мәсьәләре. Без аларга куолан килгәнчә ярдәм итәргә тырышабыз.

Алтынчысы. Сводан кайтучылар һәм аларның балалары, әти-әниләре, балалары өчен хәйрия чаралары оештыру. Бу чаралар бигрәк тә Рамазан аенда актив оештырыла. Бу эшкә Татарстан районнары да актив кушылды. Шуны аңлыйк: СВОдан кайтучыларны тыныч тормышка кайтаруда имамнарның психологик ярдәме бик кирәк булачак әле. Моны онытмасак иде.

Җиденчесе. Һәлак булучыларның исемнәрен, хәтерен мәңгеләштерү. Бу юнәлештә һәлак булучыларны лаеклы итеп җирләү һәм һәлак булучыларга истәлек такталары кую эшен алып барабыз. Шулай ук Казанның мөселман зиратында «Батырлар аллеясе» булдыру эше алып барыла.

Кардәшләр, җиңүгә өлешебезне кертик. Алга таба без нишләргә тиеш?

Беренчесе. Вәгаз-нәсыйхәтләрдә халкыбызны СВО темасында берләштерү, җиңүгә рухландыру эшен дәвам иттерү.

Икенчесе. Гуманитар ярдәм туплауда актив катнашырга тиешбез.

Өченчесе. СВОда катнашучыларны реабилитация – тернәкләндерү уздыру, тыныч тормышка кайтауда сүз белән дә, гамәл белән дә ярдәм итү.

Дүртенчесе. Мәчетләрдә һәм уку йортларында СВО геройлары белән очрашулар оештырып, патриотик тәрбия алып бару.

Бишенчесе. СВО геройларының исемнәрен мәңгеләштерү эшен алып бару. Мәчет ишегалларында геройларга истәлек такталары, стендлар кую эшен башлау.

Алтынчысы. Ватанны саклаучылар хөрмәтенә балалар арасында ярышлар, конкурслар оештыру.

Җиденчесе. Казанда Махсус хәрбия операциядә катнашучылар хөрмәтенә «Батырлар» мәчетен төзү.

Хөрмәтле Рөстәм Нургали улы, безнең эшләребездә сезнең хуплау сүзегез безгә иң зур ярдәм булыр иде.

Быел Бөек Җиңүнең 80 еллыгы. Бабаларыбызның батырлыгына, истәлегенә тугры калып, без махсус хәрби операцияда да җиңеп чыгарбыз. Иң мөһиме – рухыбыз көчле булсын, бергә булыйк, бердәм булыйк.

Сүземне СССР мөфтие шәех Габдрахман Рәсүлевнең Бөек Ватан сугышы башлангач язгач мөрәҗәгатеннән өзек белән тәмамлыйм:

«Бу сугыш Ватаныбыз өчен булган сугыш икәне мәгълүмдер. Шул сәбәпле сугыш мәйданында һәм тылда дошманны җиңгәнгә кадәр ярдәм итәргә һәрбер мөселманга дини җәһәттән зур вазыйфа-бурычтыр. Кадерле мөселман кардәшләр, сугыш мәйданында һәм тылда куркаклык, зәгыйфлек күрсәтми, гайрәт, сабырлык илә дошманны тәмам җиңгәнгә кадәр һәртөрле чаралар күрергә һәрбер мөселманга зур вазыйфа-бурычтыр!» – ди ул.