Казанда Яшьләр көнен бәйрәм итүнең төп мәйданчыгында, «УРАМ» экстрим-паркында никахлашу тантанасы булды. Быел фестивальнең төп темасы Гаилә елына багышланган. Бу хакта Татарстан Яшьләр министрлыгы матбугат хезмәтендә хәбәр иттеләр.
«Гаилә елында Яшьләр көнен уздыруның төп мәйданчыгында без яшьләрнең тантаналы никахлашуына шаһит булдык.
Киленнең Яшьләр эшләре министрлыгы тармагы хезмәткәре булуы икеләтә күңелле», - диде яшьләр эшләре министры Ринат Садыйков һәм яшь парларга бәхетле тормыш теләде.Яшь парлар Виктор һәм Лиана уртак тормышның төп вакыйгаларының берсенә бик озак әзерләнүләрен сөйләде.
«Безнең мәхәббәт тарихы 2021 елның 28 августында пляж волейболы уенында барлыкка килде. Ул вакытта без төрле командалар өчен уйнадык, һәркем үз максатлары һәм амбицияләре белән. Әмма язмыш, чын сюжет остасы буларак, безне очраштырды һәм без хәзер бер командада», - дип уртаклаштылар алар үзләренең мәхәббәт тарихы белән.
Бүген илдә Яшьләр көне билгеләп үтелә. 2023 елның маенда Россия Президенты Владимир Путин боерыкка имза куйды, аның нигезендә әлеге көн июньнең соңгы шимбәсендә бәйрәм ителә. ТР Хөкүмәт Йортында узган киңәшмәдә Рөстәм Миңнеханов Казанда һәм республика районнарында Яшьләр көнен бәйрәм иткәндә иминлек чараларын тәэмин итүне йөкләде.
Свежие комментарии