7 июньдә Түбән Камада Сабантуй була. Оештыручылар бай мәдәни программа, спорт ярышлары, концертлар, мастер-класслар һәм, әлбәттә инде, ярминкәләр белән борынгы халык бәйрәменең атмосферасын вәгъдә итә. Бәйрәм турында эшлекле дүшәмбедә Башкарма комитет җитәкчесе урынбасары Илдар Рамазанов сөйләде.
Әзерлек традицион бүләк җыю йоласыннан башлана.
17:00 сәгатьтә Химиклар урамындагы 16нчы йорт яныннан «Актай» спорт мәктәбенең җигелгән аты китә, ә бер үк вакытта шәһәрнең икенче башыннан – Мәктәп бульвары, 7/2 йорты яныннан артистлар җәяү кузгалачак. Алар Габдулла Тукай исемендәге паркта очраша, анда 18:00 сәгатьтә концерт башлана.Мәйданга түбәндәге тукталышлардан махсус автобусларда барып җитәргә була: Бызов базары, Халык иҗаты йорты, «Пассаж» сәүдә үзәге (Яшьлек ур.), «Рамус Молл» сәүдә үзәге (Сөембикә ур.) – 7-12 сәгатьләрдә, «Якорь» сәүдә үзәге (Корабельная ур.) – 7-15 сәгатьләрдә. Шәһәргә соңгы автобус 17:00 сәгатьтә китә. Юл бәясе - ике якка да 80 сум.
Бәйрәм 13 милли җәмгыятьне берләштерәчәк. Татар, рус, керәшен, чуваш, башкорт, мари, удмурт, әрмән, таҗик, үзбәк, дагыстанлы һәм башка халыкларның мәдәни берләшмәләре палаткаларында костюмнар, ашамлыклар, музыка, биюләр, халык уен кораллары һәм декоратив-гамәли сәнгать тәкъдим ителәчәк. Һәрбер берләшмә үз мәдәниятен мәхәббәт һәм җылылык белән тәкъдим итә.
Кечкенә кунакларны спорт һәм халык уеннары, мастер-класслар һәм балалар коллективлары чыгышлары көтә. Балалар арасында традицион ярышлар, капчыклар белән көрәш, вертикаль һәм авыш колгага менү оештырыла. Китапханәнең әдәби мәйданчыгында милли киемнәр һәм Бөек Ватан сугышы турындагы китаплар күргәзмәсе тәкъдим ителә.
Бөтен республикадан милли яулыклар, бәйләнгән әйберләр, уенчыклар, күн һәм текстиль эшләнмәләре, хуш исле продукция, бизәнү әйберләре, интерьер элементлары һәм башкаларны алып киләчәкләр. Аерым күргәзмәдә рәссам Илдус Мортазинның иҗаты тәкъдим ителәчәк – Сөембикә образыннан алып махсус хәрби операция турындагы полотноларга кадәр.
Гаиләләр өчен конкурслар, фотозоналар һәм шәһәр предприятиеләреннән бәйрәм мәйданчыклары әзерләнгән. Концерт программасында Фирдүс Тямаев, Данир Сабиров, Гөлназ Шакирова («ДЫШАТЬ»), «ZAKARIA» фолк-төркеме, Роберт Ямгуров, «CRYSTAL» шоу-балеты һәм «ВИА ХИТ», «SAFARI», «MINGAZOV» кавер-төркемнәре катнашачак.
Бәйрәмдә «Җир-ана бәйрәме» театральләштерелгән прологы булачак. Анда халык фольклоры мотивлары, йолалар һәм мөһим тарихи даталар: Ватанны саклаучылар елы, Җиңүнең 80 еллыгы һәм Түбән Кама районының 60 еллыгы үрелеп бара. 600дән артык катнашучы-мәктәп укучылары, актерлар, хореография һәм вокал коллективлары чыгышлары көтелә.
Читайте нас:
Дзен - https://dzen.ru/tatar-inform.ru
ВК - https://vk.com/tatarinform
Телеграм - https://t.me/iatatarinform
Свежие комментарии