Сумның долларга карата курсы товарга бәяләрне өлешчә генә билгели, сорау һәм тәкъдим нисбәте һәм башка факторлар мөһимрәк. Димәк, Америка валютасы арзанаю аркасында азык-төлек һәм киң куллану товарларының бәясе кискен төшүен көтәргә кирәкми. Г.В.Плеханов исемендәге Россия икътисад университетының дәүләт һәм муниципаль финанслар кафедрасы доценты Мария Долгова шулай дип белдерде.
Бу хакта «Прайм» агентлыгы хәбәр итә.«Валюта курсының үзгәреп торуы – бәя формалаштырудагы күп факторларның берсе, шуңа күрә долларның арзанаюы ваклап сату бәяләренең гомуми дәрәҗәсе үзгәрүгә, кызганыч ки, турыдан-туры йогынты ясамаячак», - дип искәртте белгеч.
Шул ук вакытта, валюта курсының үзгәрүе бер товарның бәясендә – тизрәк, икенчеләрендә акрынрак чагылыш таба. Беренче категориягә, аерым алганда, тиз бозыла торган азык-төлек керә. Эш шунда ки, аларны тиз арада сатарга кирәк. Шуңа күрә чит илдән кергән яшелчә һәм җиләк-җимешкә, ит һәм балык продуктларының кайбер төрләренә бәяләр якын арада бераз төшәчәк.
Икенче категориягә азык-төлек булмаган товарлар керә. Аларның күбесе, әйтик, өс һәм аяк киеме коллекцияләре, кибет киштәләрендә алып кайтканнан соң берничә ай узгач кына күренә башлый. Өстәвенә, сатучылар аларны саклауда үз чыгымнарын капларга тиеш, дип өстәде финансист.
Әгәр долларның арзанаюы алга таба да дәвам итсә, бер-ике айдан соң күпчелек товарларга (импортныкына да, үзебезнекенә дә) бәяләр шулай ук төшә башлаячак. Әмма хәзерге вакытта базарда катнашучыларның күбесе көтеп тору позициясен били, дип белдерде Долгова.
Свежие комментарии