Россия мөселманнары Дини җыены башлыгы Әлбир Крганов Мәскәүдә Халыкара мәдәни-агарту үзәге территориясендә мәчет төзелешенә Татарстан ярдәменә өметләнә. Бүген ул Татарстан Рәисе Рөстәм Миңнехановка мәчет проектын тәкъдим итте.
«Әлеге үзәк кысаларында мөселман комплексын сафка бастыру да каралган Архитекторлар зур эш башкарды, борынгы болгар һәм татар стильләрен, безнең архитектураның юнәлешләрен өйрәнде.
Проектны Рөстәм Нургалиевич та хуплады», – дип сөйләде Әлбир Крганов «Татар-информ»га.Мәчет болгар һәм татар архитектурасы элементлары, бизәкләр белән төзеләчәк. Проектта Мәскәү яки борынгы рус архитектурасы элементларын да күрергә була.
Бер гөмбәзле мәчет төрле юнәлешләр кушылмасы булачак, Болгар чорының күп элементларыннан һәм татар манарасыннан торачак.
Проект Татарстан Республикасы җитәкчелеге белән бергә алып барыла. Бүген татар эшмәкәрләренең һәм меценатларның күбесе оештыру мәсьәләләрендә ярдәм күрсәтә башлаган инде: мәчет территориясе уратып алынган һәм штаб бинасы төзелгән.
«Һичшиксез, Татарстан Республикасы әлеге проектта актив катнашыр дип өметләнәм, чөнки элек-электән татар җәмгыяте Мәскәүдә мәчет төзегән һәм илебез башкаласында мөселман тормышының локомотивы булган. Шуңа күрә әлеге мөһим халыкара проектта да Татарстан һичшиксез катнашырга тиеш кебек. Шулай ук берничә мөселман гарәб иле дә кызыксыну белдерде һәм безнең проектны өйрәнә», – дип сөйләде Крганов.
Татарстан Рәисе Рөстәм Миңнеханов белән очрашуда Әлбир Крганов «Россия – Ислам дөньясы» Стратегик караш төркеме эше, Kazan Summit халыкара икътисад форумы һәм Ислам динен рәсми кабул итү көнен бәйрәм итү планнары турында фикерләште.
Свежие комментарии