Татарстанда авыл хуҗалыгы тармагында карьерасын башлаган яшь белгечләр өчен бер тапкыр бирелә торган түләү күләмен берничә тапкыр арттырырга ниятлиләр. Биредә белем бирү учреждениесен тәмамлаган елда эшкә урнашкан һәм агросәнәгать комплексында ким дигәндә өч ел эшләргә вәгъдә биргән югары яки урта махсус белемле хезмәткәрләр хакында сүз бара.
Республика Авыл хуҗалыгы һәм азык-төлек министрлыгы әзерләгән ТР Хөкүмәте карар проекты коррупциягә каршы экспертиза уза.
Хәзерге вакытта югары уку йортын тәмамлаучылар өчен түләү күләме – 300 мең, урта һөнәри белем бирү учреждениеләрен тәмамлаучылар өчен 150 мең сум тәшкил итә. Әгәр үзгәрешләр кабул ителсә, яшь белгечләрнең ике категориясе өчен дә түләү 750 мең сумга кадәр артачак. Аны гариза тапшырган вакытта әле 35 яше тулмаган кешеләр алырга хокуклы.
Шушы ук карар белән 7,5 мең сум күләмендәге айлык түләү гамәлдән чыгарыла. Хәзерге вакытта ул яшь хезмәткәрләргә эшкә урнашканнан соң бер ел дәвамында түләнә.
Свежие комментарии