Россиядә торак өчен тупланма кертемнәр булдырырга планлаштыралар

Дәүләт Думасында торак өчен тупланма кертемнәр турында закон проекты икенче укылышка әзерләнә, ул гражданнарга торак сатып алуга акча тупларга ярдәм итәчәк депозитларның яңа төре. Бу хакта «Татар-информ»га Дәүләт Думасының Финанс базары комитеты рәисе Анатолий Аксаков сөйләде.

«Клиент мондый максатчан депозитта акчаны алга таба ипотека килешүе төзү хокукы белән туплаячак, ә аннары аларны йә ипотека рәсмиләштерү өчен, йә торак сатып алу өчен беренчел кертем буларак кулланачак», – дип аңлатты агентлык әңгәмәдәше.

Банклар мондый депозитларны тотучылар өчен махсус шартлар тәкъдим итәр дип көтелә. Ул – торак кертемнәре буенча югары ставка һәм/яки ипотека буенча түбән ставка. Моннан тыш, торак кертемнәренең өстенлеге иминият саклавы югары булачак. Гадәти депозитлар өчен стандарт 1,4 млн урынына 10 млн сумга кадәр каралган. Аксаков фикеренчә, бу тупланмаларның әлеге төрен гражданнар өчен тагын да кызыклырак һәм ышанычлырак итәчәк.

«Торак тупланмалары системасын эшләтеп җибәрү ипотека банк продуктларына фаразлана торган булачак ихтыяҗны формалаштырырга, шулай ук кредит оешмаларының озак вакытлы ресурс базасын киңәйтергә мөмкинлек бирәчәк», – диде парламентарий.

Ул шулай ук узган ел Финанс министрлыгына студентлар һәм яшь белгечләр өчен ташламалы ипотека программаларын эшләү турында тәкъдимнәр килүе турында сөйләде. Әмма Россия Банкының төп ставкасы 21 процент тәшкил иткәнгә күрә, дәүләт ярдәме белән ипотека программалары бюджетка югары йөкләнеш тудырырга мөмкин,чөнки ставкалар нәкъ менә аның хисабына субсидияләнә. Шуңа күрә хәзерге вакытта ипотека буенча ниндидер яңа ташламалы программалар барлыкка килү ихтималы аз.

Хәзер Россиядә алты төп ташламалы ипотека программасы гамәлдә. Бу гаилә, авыл, хәрби һәм IT-ипотека, Ерак Көнчыгышта һәм Арктика зонасында торак сатып алуга ставкалары киметелгән кредитлар, шулай ук илнең яңа төбәкләрендә яшәүчеләр өчен социаль ипотека. Кайбер шәһәрләрдә һәм республикаларда җирле ташламалы программалар бар. Моннан тыш, Хөкүмәт халыкка ярдәм итүнең башка чараларын да эшли. Бу, мисал өчен, торак лизингы һәм халыкның аерым категорияләре өчен адреслы кредитлар.