Татарстанда яңа сайлау циклына – ТР Рәисен һәм муниципаль берәмлекләрнең вәкиллекле органнары депутатларын сайлауга әзерләнәләр. Шуңа бәйле рәвештә сайлау кампаниясен имин һәм уңышлы режимда уздырырга ярдәм итәчәк бурычларны хәл итү таләп ителә. Бу хакта ТР Дәүләт Советы Рәисе һәм «Бердәм Россия» партиясенең Татарстан төбәк бүлеге секретаре Фәрит Мөхәммәтшин Теләче районына эш сәфәре барышында белдерде, дип хәбәр итә «Бердәм Россия» партиясенең Татарстан төбәк бүлеге матбугат хезмәте.
Муниципалитетта «Бердәм Россия» көне кысаларында берничә чара узды. Мөхәммәтшинны «Бердәм Россия»нең Татарстан төбәк бүлеге башкарма комитеты җитәкчесе Марат Сәмигуллин озата йөрде.
«Бүген партия активы һәм район халкы белән традицион очрашу булды. Ул бездә «Бердәм Россия» көне» партия проекты кысаларында уза. Тиздән көтелгән сайлау кампаниясе алдыннан, республикада сайлау процедурасын оешкан рәвештә уздыру бурычын куйдым. Без җирле үзидарә органнарына 7,5 мең депутат һәм Татарстан Республикасы Рәисен сайларга тиеш булачакбыз», - дип билгеләде сәясәтче журналистлар белән аралашу барышында.
«Әлбәттә, бу кешеләр безнең партия активы – вакыт белән сыналган, җитешлеген исбатлаган кешеләр булсын иде. Моның аша республикабызның һәм гомумән илебезнең алга таба үсешен хәл итәр идек», - дип өстәде ул.
«Без Татарстанның, партиянең җитәкчелегенә барлык проектларда катнашу мөмкинлеге өчен рәхмәтле. Бүгенге көндә бик күп республика программалары, илкүләм проектлар, партия проектлары гамәлгә ашырыла. Без бөтен җирдә катнашабыз – халык моны күрә, сизә. Барлык дәрәҗәдәге депутатлар бар төрле башлангычларда актив катнаша, һәм бу безнең районны үстерергә ярдәм итә», - дип белдерде Теләче районы башлыгы һәм партиянең җирле бүлеге секретаре Айрат Фәтхуллин.
«Бердәм Россия» көнен» үткәрүнең максаты – сайлаучыларның партиягә карата ышанычын ныгыту өчен эш кенә түгел, ә татарстанлыларга көндәлек ихтыяҗлары белән конкрет ярдәм күрсәтүне оештыру, дип билгеләп үтте Фәрит Мөхәммәтшин Теләче районы активистлары белән очрашуда.
Аның сүзләренчә, социаль проблемаларның актуальлеген «гражданнарның кабул итү бүлмәләренә, партиядән депутатларга мөрәҗәгатьләре, узган сайлау кампанияләре барышында сайлаучылар белдергән «теләк һәм таләпләр» раслый, һәм аларны үтәү безнең эшчәнлекнең өстенлекле юнәлешләренең берсе булып кала».
ТР Дәүләт Советы Рәисе шулай ук Бөек Ватан сугышында Җиңүнең 80 еллыгын бәйрәм итүгә әзерләнергә һәм ветераннарга ярдәм итәргә кирәк булуга игътибар итте. «Без аларга тормышыбызда актив катнашуларын дәвам итүләре өчен рәхмәт белдерергә тиеш. Алар алдынгы сафларда. Без яшьләребезне аларның үрнәгендә тәрбияләргә тиеш», - диде ул.
«Бердәм Россия» көне»нең соңгы чарасы булып партия билетлары һәм бүләкләр тапшыру тантанасы торды. «Татарстан Республикасы алдындагы казанышлары өчен» ордены медальләре белән Нурсаф Рамазанов һәм Рөстәм Вәлиуллин бүләкләнде. Сайлауларны оештырудагы казанышлары өчен Татарстан Республикасы Үзәк сайлау комиссиясенең мактау билгеләрен Теләче районы башлыгы Айрат Фәтхуллин һәм 2680нче Сауш авылы участок сайлау комиссиясе секретаре Резеда Сәйфетдиновага тапшырылды.
Фәрит Мөхәммәтшинның Рәхмәт хатлары белән махсус хәрби операциядә катнашучыларга һәм яңа төбәкләрдә яшәүчеләргә ярдәм күрсәткән өчен партия әгъзасы Галина Вәлиуллина, Олы Мәтәскә авыл җирлеге башлыгы, беренчел бүлекчә секретаре Миңнәхмәт Вәлиуллин, Теләче үзәк район хастаханәсе складының элеккеге мөдире Алинә Гайнетдинова, шәхси эшмәкәрләр Илдар Фазылҗанов, Хәким Һадиуллин һәм Фәнис Низамиев бүләкләнде.
Свежие комментарии