<p>Пермь крае Барда авылында XIV Бөтенроссия авыл Сабантуе башланып китте. Тантанада Татарстан Республикасы Рәисе <strong>Рөстәм Миңнеханов</strong> катнашты.</p> <p>Пермь крае губернаторы <strong>Дмитрий Махонин</strong> Бөтенроссия авыл Сабан туеның Пермь краенда икенче тапкыр үткәрелүен искәртте.
</p> <p>«Икенче тапкыр Пермь җирендә Бөтенроссия авыл Сабантуен каршылыйбыз. Без бәйрәмне истә калырлык итеп оештырырга тырыштык. Пермь крае – күпмилләтле төбәк. Без халыкларыбызның гореф-гадәтләрен хөрмәт итәбез. Сезгә яхшы кәеф телим», – диде ул.</p> <p><img alt="" height="878" src="https://tatar-inform.tatar/images/uploads/454a2d0c949370f1f236fac1792881ab.jpeg" width="1170" /></p> <p>Татарстан Республикасы Рәисе Рөстәм Миңнеханов халыкны бәйрәм белән котлады.</p> <p>«Чын күңелдән барыгызны да Сабантуй бәйрәме белән котлыйм. Һәммәгезгә сәламәтлек, дөньялар тыныч булсын, эшләребез матур булсын. Бергә булырга кирәк, бергә булыйк!» – диде ул.</p> <p>Татарстан Рәисе Пермь краеның көн саен матурлануын искәртте. «Пермь крае, Барда районы җитәкчеләренә җылы каршы алулары өчен рәхмәт! Бәйрәм белән!» – диде ул.</p> <p>Рәис Татарстан Республикасы алдындагы казанышлары өчен ордены медале белән Барда районы башлыгы <strong>Хәлил Алапановны </strong>бүләкләде.</p> <p>«Зур милли бәйрәмебезне үткәрүне безгә ышанып тапшырганыгыз өчен зур рәхмәт. Бу бәйрәмгә барыбыз бергә әзерләндек: чистарттык, яңарттык, төзедек. Бик зур рәхмәт! Бу бәйрәм территориябез үсешенә киләчәктә дә ярдәм итәр», – диде ул.</p> <p>Ачылыш тантанасын Тинчурин Театры артисты <strong>Резеда Сәлахова </strong>һәм Олимпия чемпионы <strong>Алексей Ягудин</strong> алып бара.</p>
Свежие комментарии