Тимергалиевлар гаиләсе йортын махсус операциягә ярдәм итү остаханәсенә әйләндергән

Татарстанның Яшел Үзән районында яшәүче Тимергалиевлар гаиләсе йортын махсус хәрби операциядә катнашучыларга ярдәм итү остаханәсенә әйләндергән.

Моңа кадәр йорт хуҗасы Әнәс Тимергалиев барысын да үз куллары белән эшләгән: буа аша күпер салган, мунча тышын челтәрләп уеп бизәгән, балалар мәйданчыгы булдырган һәм әтәч сыман флюгер ясаган.

Монда бөтен нәрсә файдага килгән: әбинең инвентаре («Бия» һәм «Басыр» кәстрүлләре) ата-бабалар истәлеген саклый, ә чәй агачы буыннар дәвамчанлыгы символы булып тора.

Алтын балыклы буа һәм экзотик тавыклар (Германия, Чехия, Кытай тавыгы, ефәк әтәч һәм Пушкин токымы) тирә-як урманнар белән уратып алынган матур ландшафтны тулыландыра. «Монда рәхәт: табигать, яшеллек, – ди Әнәс. – Монда матурлык, җаның ял итә».

Йорт хуҗасы 2023 елның октябреннән бирле атна саен үзенең остаханәсендә табуретлар ясый – «Үзебезнекеләрне ташламыйбыз» волонтерлык төркемендәге теләктәшләренә бүләк. «Мин аларны фронтка ярдәм итүче кешеләрнең туган көннәренә ясыйм», - дип сөйли ул.

2014 елда Донбасста низаг башлангач, Тимергалиевлар гаиләсе ярдәм итү юллары эзли башлаган. Хәйрия концертында очраклы очрашу нәтиҗәсендә алар волонтер булып киткән. Тимергалиевлар 2022 елда QR-иганәләрнең ышанычлылыгына шикләнгән һәм хәрбиләргә барып җитә торган ярдәм белән шөгыльләнүчеләр эшчәнлегенә кушылган.

Әнәс маскировка челтәрләре үрә. Хәзерге вакытта ул һәм тагын берничә волонтер атнасына дүрт тапкыр җидешәр сәгатьлек сменага 7-8 челтәр ясый. «Иң кирәкле эшләнмә», – дип аңлата волонтерлар.

Тимергалиевларның башкарган эше өчен бүләкләре аз түгел: «леший» костюмы өчен рәхмәт хаты, ярминкәләрдә җыелган һәм бүләк ителгән картиналар, быел язын тапшырылган «Волонтер. Ирекле» медале.

«Без бер зур гаилә – төркемдәш дуслар һәм алгы сызыкта көрәшүчеләр, - дип ышана Әнәс. Һәм без туктамаячакбыз».

Элегрәк ТР Рәисе Рөстәм Миңнеханов Татарстан Дәүләт Советына еллык Юлламасында махсус хәрби операциядә катнашучыларга ярдәм күрсәтүгә мөһим өлеш керткән өчен волонтерларга рәхмәт белдерде. «Кешеләр моны үз тирәсендә шундый ук битараф булмаган гражданнарны берләштереп, фикердәшләрдән тулы бер командалар җыеп ихлас күңелдән һәм чын йөрәктән эшли», - дип искәртте республика җитәкчесе.

Соңрак Миңнеханов Мәскәү Кремлендә Россия Президенты Владимир Путин белән очрашуда махсус операциядә катнашучыларга күрсәтелә торган ярдәм турында сөйләде. «Гуманитар ярдәм күрсәтү юнәлешендә бик зур эш башкарабыз. Һәр шәһәргә, һәр муниципалитетка барып эшлибез. Халык та, компанияләр дә зур активлык күрсәтә: 4389 тонна йөк формалаштырылды һәм җибәрелде», – диде ул.

Материал Юлия Озерова катнашында әзерләнде

 

Читайте нас:

Дзен - https://dzen.ru/tatar-inform.ru

ВК - https://vk.com/tatarinform

Телеграм - https://t.me/iatatarinform

YouTube - https://www.youtube.com/user/tatarinform/