<p>25 июньдә Казанда «Шомбай-fest» фестивале старт ала. Ул ТР Мәдәният министрлыгы һәм «Әкият» татар дәүләт курчак театры инициативасы белән гамәлгә куелганнан бирле бишенче мәртәбә үткәрелә.</p> <p>«Фестиваль кысаларында театр үзенең юбилеен да уздырачак. «Әкият» татар дәүләт курчак театры быел 90 еллыгын бәйрәм итә», – дип искәртте фестивальгә һәм «Әкият» татар дәүләт курчак театрының яңалыкларына багышланган матбугат конференциясендә ТР мәдәният министры урынбасары <strong>Дамир Натфуллин</strong>.
</p> <p>Ул фестивальнең 2013 елда гамәлгә куелып, шул вакыт эчендә 70ләп театр коллективының катнашуы турында әйтте. «Фестиваль курчак театрлары арасында дуслыкны һәм багланышларны ныгытуда зур роль уйный», – диде ул.</p> <p>Безнең быел юбилейлар елы: театрга – 90, фестивальгә – 5, театраль лабораториябез дә биш мәртәбә узды», – дип сүзгә кушылды <strong>Илгиз Зәйниев</strong>. Быел Илгиз Зәйниевның курчак театрына сәнгать җитәкчесе итеп куелуына да 5 ел була.</p> <p>Фестиваль дәвамында 14 спектакль күрсәтеләчәк. Казанга Беларусь һәм Азәрбәйҗан театрлары да килә. Оештыручылар тамашачыны фестиваль спектакльләрен карарга чакыра.</p> <p>Фестиваль 2 июльгә кадәр дәвам итәчәк.</p> <p><img alt="" height="781" src="https://tatar-inform.tatar/images/uploads/photo/2024/6/19/fbb3fb82efd63ad1d823bcb3f8f61637.JPG" width="1171" /></p>
Свежие комментарии