Россиядә билгеләнгән вакытка кадәр салым түләмәгән күчемсез милек, җир кишәрлеге һәм транспорт хуҗаларына көн саен Россия банкының актуаль төп ставкасының өч йөздән бер өлеше күләмендә пеня исәпләнәчәк. Түләнмәгән һәр 100 сум саен Федераль салым хезмәте көненә якынча 5,5 тиен өстәячәк. Бу хакта РИА Новости хәбәр итә.
Салым түләүләре турында мәгълүмат Федераль салым хезмәте сайтындагы шәхси кабинетта, «Физик затлар салымнары» кушымтасында һәм «Дәүләт хезмәтләре» порталында урнаштырылган. Гражданнарның бер өлеше салым турында хәбәрләрне элеккечә почта аша ала.
Хезмәттә аңлатуларынча, салым турында хәбәр алмау салым түләү бурычыннан азат итми. Теркәлү адресында яшәмәүчеләргә шәхси кабинетка керү мөмкинлеген рәсмиләштерергә киңәш иттеләр, чөнки түләү тоткарланган очракта бурычны тулысынча каплаганчы көн саен пеня исәпләнәчәк.
Мөлкәт салымнарын 2025 елның 1 декабренә кадәр түләргә кирәк. 2 декабрьдән башлап, автомат рәвештә пеня исәпләнә башлаячак.
Аны исәпләү тәртибе Салым кодексында беркетелгән: 2025 елда физик затлар өчен Үзәк банкның бурыч барлыкка килгән көнгә актуаль булган төп ставкасының 1/300 өлеше күләмендәге ставка кулланыла. Пеня бурычны каплаганчы көн саен исәпләнә.
Әгәр салым түләнмәсә, Федераль салым хезмәте өч ай дәвамында бурычны түләү турында таләп юллаячак. Әлеге таләп үтәлмәгән очракта, бурычны түләтү процедурасы башланачак. 2025 елдан салым хезмәте бурычларны суд карарыннан башка гына гражданнарның счетыннан ала ала.
Салымнарын түләмәүчеләр пенядан тыш шулай ук штраф та түли ала.
Бурыч зур булган очракта җинаять җаваплылыгы да янарга мөмкин.
Читайте нас:
Дзен - https://dzen.ru/tatar-inform.ru
ВК - https://vk.com/tatarinform
Телеграм - https://t.me/iatatarinform
Свежие комментарии