Ятим балаларны тәрбиягә алып, аларны үз канаты астына сыендырган кешеләр өчен Казанда ифтар мәҗлесе оештырылды. Питрәч, Биектау, Яшел Үзән һәм Казанның төрле районнарыннан килгән гаиләләр өчен «Г.Утыз Имәни исемендәге «Ал Таң» мәчете имамы Ирек хәзрәт Җиһаншин вәгазь сөйләде, әти-әниләрнең дә, тәрбиягә алынган балаларның да сорауларына җавап бирде, дип хәбәр итте «Татар-информ»га Рафис Миннәхмәтов.
Ифтарда катнашучылар арасында Татарстан Дәүләт Советы депутаты, Татарстан Республикасы законнарының татар һәм рус телләрендәге текстлары тәңгәллеген билгеләү буенча Татарстан Республикасы Дәүләт Советы Комиссиясе рәисе Камил Гыйльманов та бар иде.
«Безнең динебез ятимнәргә карата рәхимле һәм шәфкатьле булырга өнди, – диде Камил Гыйльманов. – Без хатыным белән шулай ук ике кызны тәрбиягә алып үстердек. Аллага шөкер, мәгънәле балалар булып үсеп җиттеләр, үз юлларын таптылар. Алар өчен сөенеп яшибез. Балаларны тәрбияләү ул – олы әманәт, аның җаваплылыгы бик зур. Сезгә, олы йөрәкле, киң күңелле әти-әниләргә, әби-бабайларга – барыгызга да ятимнәрне сыендырганыгыз өчен рәхмәт!»
Казаннан Марат һәм Гүзәл Вәлиуллиннар бүгенге көндә сигез бала тәрбияли.
«Үзебезнең өч кызыбыз, бер улыбыз бар иде. Мин төзелештә эшләдем, хатыным балалар бакчасында. Ятим балалар турында сүзләр ишеткән, язмалар укыган, тапшырулар караган саен йөрәк өзгәләнә иде. Кайчан, ничек карар кылганыбызны да әйтә алмыйм, барысы да үзеннән-үзе килеп чыкты: тәрбиягә тагын өч кыз һәм бер малай алдык. Үзара дус-тату булып яшиләр, Аллага шөкер. Барысы да тигез, барысы да үзебезнеке», – ди Марат Вәлиуллин.
Чара ахырында һәр гаиләгә, һәр балага бүләкләр тапшырылды.
«Тәрбиягә алынган гаиләләр өчен ифтарны икенче ел рәттән оештырабыз, – диде «Терәк-Опора» хәйрия фондының идарә рәисе Мансур Һашимов. – Аларны үзебез уздырган төрле чараларга җәлеп итәргә, һәрьяклап ярдәм күрсәтергә тырышабыз. Ятимнәргә күңел җылысын биргән кешеләргә җәмгыятебездән дә тиешле игътибар булырга тиеш».
Свежие комментарии