Татарстан шәһәрләрендәге күп балалы гаиләләргә башка районнарда җир бирәчәкләр

<p>Татарстанда күп балалы гаиләләргә җир кишәрлекләре бирү вариантлары киңәйтеләчәк. Гаиләләр башка муниципаль берәмлекләрдә җир ала алачак. Закон проектын депутатлар ТР Дәүләт Советының 54 утырышында кабул итте.</p> <p>«Җир кишәрлекләре белән тәэмин ителмәгән күп балалы гаиләләрнең иң күп саны шәһәр округларында исәпләнә.

Хәзерге вакытта анда гражданнарның бу категориясенә бирү өчен җир кишәрлекләре җитмәү белән бәйле проблема бар», - дип сөйләде парламентның Экология, табигатьтән файдалану, агросәнәгать һәм азык-төлек сәясәте комитеты рәисе <strong>Азат Хамаев</strong>.</p> <p>Ул шәһәр округларында даими нигездә яшәүче күп балалы гаиләләргә республиканың башка муниципаль берәмлекләрендә урнашкан җир кишәрлекләрен бирергә мөмкин, диде.</p> <p>Әйтик, Казанда яшәүче гаиләләр Югары Ослан, Биектау, Яшел Үзән, Лаеш, Питрәч районнарында җир ала алачак. Чаллыда яшәүчеләргә җир кишәрлекләре Тукай районы чикләрендә биреләчәк.</p> <p>Башта күп балалы гаиләләргә кишәрлекләр дәүләт һәм муниципаль милектәге буш җирләрдән бирелгән. Моннан тыш, Федераль милектә булган җир кишәрлекләре дә тапшырылган.</p> <p> </p>