Татарстан җитәкчелеге Илгиз Хәйруллинның вафат булуына бәйле рәвештә кайгы уртаклашты

Татарстан Рәисе Рөстәм Миңнеханов, республика Дәүләт Киңәшчесе Минтимер Шәймиев һәм ТР җитәкчелегенең башка вәкилләре ТАССРның атказанган мәдәният хезмәткәре, ТР Иҗтимагый палатасының элеккеге рәисе, ТР Премьер-министрының элеккеге урынбасары Илгиз Хәйруллинның вафат булуына бәйле рәвештә кайгы уртаклашты.

«Илгиз Кәлимулла улы Хәйруллинга зур бурычларны хәл итәргә туры килгән барлык участокларда да югары бурыч хисе һәм үз эшенә бирелгәнлек, куелган максатка ирешүдә үҗәтлек хас иде. Һөнәри осталыгы, гаҗәеп энергиясе, үз идеалларына һәм ышануларына тугрылыгы, ватанпәрвәрлеге, шулай ук кешеләргә игътибарлы мөнәсәбәте нәтиҗәсендә ул хезмәттәшләре һәм җәмәгатьчелек арасында лаеклы абруй казанды», – дип билгеләп үтелә кайгынамәдә.

Дәүләт һәм җәмәгать эшлеклесе Илгиз Хәйруллин 22 февральдә 86нчы яшендә вафат булды. Аның белән хушлашу мәрасиме бүген А.С.Пушкин исемендәге Мәдәният үзәгендә уза. Хәйруллинны Арча зиратында җирләячәкләр.

Илгиз Хәйруллин 1940 елның 2 гыйнварында ТАССРның Биектау районы Ямаширмә авылында туа. 1957 елда Арча педагогика училищесын тәмамлаганнан соң, хезмәт юлын Ямаширмә урта мәктәбендә укытучы булып башлый. 1964 елда Казан дәүләт педагогика институты дипломын алгач, Комсомол линиясе буенча төрле вазифаларда эшли һәм инструктордан алып ВЛКСМның Татарстан өлкә комитеты секретарена кадәр һөнәри юл үтә.

Алга таба КПССның Татарстан өлкә комитетында эшләвен дәвам итә: 1972 елда – мәдәният бүлеге инструкторы, 1978 елда пропаганда һәм агитация бүлегенең матбугат, радио һәм телевидение секторы мөдире була.

«Аның актив тормыш позициясе, оештыру таланты һәм һөнәри осталыгы игътибарсыз калмады. 1982 елдан И.К.Хәйруллин 10 ел дәвамында телевидение һәм радиотапшырулар буенча ТАССР Дәүләт комитетын җитәкли. Аның җитәкчелегендә республикада телевидение төсле форматка күчерелде, төрле пландагы теле һәм радиотапшырулар булдырылды, Үзәк телевизион каналлар челтәрендә җирле тапшырулар вакыты артты. Параллель рәвештә, 1985-1990 елларда, ул Татарстан Республикасы Журналистлар берлеге идарәсе рәисе дә була», - диелә кайгынамәдә.

1992 елда Илгиз Хәйруллинны Татарстан Республикасы Премьер-министры урынбасары итеп билгелиләр. 2001 елга кадәр ул социаль өлкәдә дәүләт сәясәтенә кураторлык итә.

«Катлаулы елларда аның тырышлыгы эшчәнлекнең төп юнәлешләрен, медицина, мәгариф, спорт, мәдәният учреждениеләренең матди-техник базасын һәм башкаларны саклап калуга һәм үстерүгә юнәлдерелде. И.К.Хәйруллин иҗтимагый тормышта актив катнаша. 2006 елда Татарстан Республикасы Иҗтимагый палатасының беренче рәисе итеп сайлана һәм аны торгызу, эшнең төп принципларын һәм юнәлешләрен ныгыту өчен күп эшләр башкара. 2011 елда Россия Федерациясе Иҗтимагый палатасы составына керә», - дип билгеләп үтелә хәбәрдә.

Татарстан Республикасы Иҗтимагый палатасы эшчәнлеген формалаштыруга керткән зур өлешен исәпкә алып, Хәйруллин 2015 елда гражданлык җәмгыяте институтларын үстерүгә керткән өлеше өчен ТР Президенты премиясенә лаек булды.

Аның бүләкләре арасында шулай ук II дәрәҗә «Ватан алдындагы хезмәтләр өчен» орден медале, «Татарстан Республикасы алдындагы хезмәтләр өчен» ордены, Мактау билгесе, «Татарстан Республикасы алдындагы хезмәтләр өчен» орден медале, «Фидакарь хезмәт өчен», «Татарстан Автономияле Совет Социалистик Республикасы төзелүгә 100 ел», «Хезмәттәге батырлыгы өчен», «Казанның 1000 еллыгы истәлегенә» медальләре, «ТАССРның атказанган мәдәният хезмәткәре» дигән мактаулы исем һ.б. бар.