Татарстан ел башыннан 15,1 миллион АКШ долларына сөт продукциясе экспортлаган. Бу узган елның шул ук чоры белән чагыштырганда 37,9 процентка күбрәк, дип хәбәр итә Татарстан Республикасы Авыл хуҗалыгы һәм азык-төлек министрлыгы матбугат хезмәте.
«Җибәрелгән сөт продукциясе күләме 7,6 мең тоннаны тәшкил итте.
Сөт һәм каймак 9,7 миллион доллар, туңдырма 3 миллион доллар, сыр һәм эремчек 1,5 миллион доллар, эремчек суы 425 мең долларга экспортланды», - дип билгеләделәр министрлыкта.Татарстан сөт продукциясе Якын Көнчыгыш һәм Кавказ аръягына, Азия һәм Төньяк Африка илләренә җибәрелде. Максатлы илләр – Кытай, Һиндстан, Иран һәм Таможня берлеге дәүләтләре.
Россиядә сөт җитештерү күләменең 6,5 проценты Татарстанга туры килә. Узган ел 2,2 миллион тоннага якын җитештерелгән.
Октябрь башына булган мәгълүматларга караганда, быел республика агросәнәгать комплексы продукциясе экспорты 305,4 миллион АКШ доллары, ягъни планнан 66,7 процентны тәшкил иткән.
Свежие комментарии