Новосибирск шәһәренең татар мәдәнияте йортында беренче мәртәбә яшьләр ифтары узды. Бу чараны уздыру инициативасын яшьләр үзләре белдергән, дип яза «Новосибирские ТАТАРЫ».
Фото: © «Новосибирские татары»
Ифтар, шушындый чараларга хас булганча, җылы, рәхәт мохиттә узган. Эшне яшьләр активы: Руслан Мөхәммәтҗәнова, Язгөл Ногманова, Әхтәм Мостафин, Даур Рәхимҗанов, Илдус Рәхимҗанов, Надия Рәҗәпова оештырган.
Ифтарда имам Али Гыймалтдинов та катнашкан, догалар укыган.
Фото: © «Новосибирские татары»
Мәртәбәле кунаклар арасында Новосибирск өлкәсенең Татар милли-мәдәни автономиясе президенты Әмир Гәрәев һәм Новосибирск өлкәсенең Татар мәдәни үзәге директоры Рауза Тихомирова да булган.
Мәҗлестә Әхмәт Зәйнетдинов, Мөхәммәт Мирҗәлилов һәм Торобек Кабылов нәшидләр, «Илһам» әдәбият клубы шигырьләр укыган, ә Эмиль Әхмәтшин төрле телләрдә җырлар башкарган.
«Ифтарны оештыруда һәм уздыруда ярдәм иткән һәр кешегә рәхмәт белдерәбез. Әлеге ифтар матур гадәтләргә башлангыч һәм яңа очрашуларга илһам булсын», – диелә конгресс хәбәрендә.
Свежие комментарии