Газыймовлар гаиләсе Рамазанга иң матур бизәлеш өчен хаҗга юллама алды

Татарстан мөселманнары Диния нәзарәтендә «Нурлы Рамазан» бәйгесенең җиңүчесе һәм финалистлары бүләкләнде.

Татарстан мөселманнары Диния нәзарәтендә «Нурлы Рамазан» бәйгесенең җиңүчесе һәм финалистлары бүләкләнде. Җиңүче итеп Мөслим районы Баланлы авылында яшәүче Газыймовлар гаиләсе танылды. Аларга хаҗга юллама тапшырдылар.

Җәмил хәзрәт һәм Гүзәл ханым Газыймовлар үз йортларын гына түгел, бөтен хуҗалыкны, урам тирәсен, шулай ук мәчетне дә бизәгәннәр. Йорт капкасы, койма, урам почмагына зур итеп «Рамазан» һәм «Сүбхәналлаһ» сүзләре язганнар. Моның өчен алар бәйгегә ике ай буе әзерләнгән. Жюри аларның киң колачлы бизәлеше өчен төп өстенлек биргән.

«Хаҗ дип катнашмадык. Матур булсын, бәйрәмебезне күрсеннәр дип катнаштык», – ди Җәмил хәзрәт Газыймов. Нәтиҗәдә, элек таравих намазларына якынча 10-15 кеше җыела торган булса, быел 30дан артык кеше килгән. Җиңүчеләр киләсе елда да катнашырга ниятли. Моннан тыш, Җәмил хәзрәт авылда шундый ук бәйге башлап җибәргән. Хәзергә анда өч гаилә катнаша.

Финалга чыккан тугыз катнашучы арасында мәчетләр һәм шәхси йортлар бар. Аларга мактау кәгазьләре һәм истәлек бүләкләре тапшырылды. Эшләр Казан, Арча, Буа, Питрәч, Кукмара, Сабадан кабул ителгән.

Барлыгы 38 гариза килгән, шуларның 21е – дини оешмалардан. Иң актив катнашучылар Казан, Алабуга, Мамадыш, Чистай районнары булуы ачыкланды.