Бүген «Ак Барс» хоккейчылары плей-офф этабының дүртенче уенында «Автомобилист» командасын 7:2 исәбе белән җиңде. Матч Казанда «Татнефть Арена» боз сараенда узды.
- Плей-оффта командалар дүрт җиңүгә кадәр көч сынаша. Дүрт тапкыр җиңгән команда киләсе турга үтә, ә җиңелгәне Гагарин Кубогы өчен көрәштән төшеп кала. Хәзер ике команда исәбендә дә икешәр җиңү.
Әлеге уен «Ак Барс» һөҗүмчесе Кирилл Семёнов өчен Континенталь хоккей лигасында 700нчесе булды. Александр Барабанов КХЛда 100нче юбилей алкасын һәм 101нчесен кертте.
Беренче периодның икенче минутында исәп ачылды, беренче алканы «Ак Барс» сакчысы Степан Фальковский кертте (1:0). Алтынчы минутта икенче гол керде. Екатеринбург командасы уенчысы партнерына артка таба пас бирмәкче иде, тик аның пасын «Ак Барс» һөҗүмчесе Александр Барабанов тотып алды һәм туры «Автомобилист» капкасына бәрде (2:0). Унынчы минутта «Ак Барс» өченче алкасын кертте, гол авторы – Илья Сафонов (3:0). Бу голдан соң «Автомобилист» утыз секундлык тәнәфес алды.
Унберенче минутта «Автомобилист» капкасына дүртенче гол керде, аны Никита Дыняк кертте (4:0). Шуннан соң Екатеринбург командасы капкачысын алмаштырырга булды, бозга Владимир Галкин урынына узган уеннарда төп капкачы булган Евгений Аликин чыкты. Бераздан «Ак Барс» капитаны Дмитрий Яшкин кагыйдә бозганы өчен штрафчылар эскәмиясенә утырды. Казан командасы, азчылыкта уйнаса да, капкасына алка керттермәде.
Икенче период башында хөкемдарлар Дмитрий Яшкинга тагын штрафчылар эскәмиясенә юл күрсәтте, аны кәшәкәсен югары күтәреп уйнауда гаепләделәр. Җанатарлар егылган уенчыга «симулянт», - дип кычкыра башлады. Таблодан ул мизгелне кабатлап күрсәттеләр, анда Дмитрий Яшкин көндәшенә кәшәкәсе белән бәрмәгәне күренде, җанатарлар тагын да кызды. Хөкемдарларга видеокабатлау карарга туры килде, аннан соң алар «Автомобилист» командасы уенчысы йөзенә үз кәшәкәсе белән эләккән, штраф юк дип игълан итте.
Өченче минутта «Ак Барс» барыбер азчылыкта калды, Алексей Марченкога ике минутлык штраф бирелде. «Ак Барс»ның азчылыкта уйнау вакыты беткәндә, алка Казан командасы капкасына керде. Аны бик каты этеш-төртеш белән керттеләр. Аннан соң Даррен Диц һәм Илья Сафонов сугышып алды, икесенә дә дорфалык өчен штраф бирелде. «Ак Барс» тренерлары хөкемдарларга видокабатлау карарга сорап мөрәҗәгать итте, алар гол кертелгәнче кул белән пас бирелүен тикшерергә сорады. Хөкемдарлар кул белән пас булмады диде һәм «Ак Барс»ка вакытны тоткарлаганнары өчен штраф бирде. Гол авторы – «Автомобилист» капитаны Анатолий Голышев (4:1).
Алтынчы минутта «Автомобилист»ка да бозга артык уенчы чыгарганнары өчен штраф бирелде. «Ак Барс»ның минут ярым күпчелектә уйнау мөмкинлеге булды, тик гол кермәде. Унберенче минутта Александр Шаров «Ак Барс» капкасына икенче алканы кертте (4:2). Унөченче минутта тагын исәп үзгәрде, бу юлы алканы Казан командасы һөҗүмчесе Николас Петан кертте (5:2). Унбишенче минутта «Ак Барс» күпчелектә уйнарга калды, хөкемдарлар, видеокабатлау карап, «Автомобилист» уенчысы Александр Шаровны көндәшенә терсәге белән бәргәне өчен штрафчылар эскәмиясенә утыртты. Уналтынчы минутта күпчелектә гол керде, Александр Барабанов дубль ясады (6:2).
Өченче периодта «Автомобилист» яңадан капкасын сакларга Владимир Галкинны чыгарды. Период башында Кирилл Семёнов рәттән ике тапкыр кагыйдә бозды. Бераздан «Автомобилист» уенчысы Семён Кизимовка дүрт минутлык штраф бирелде. Ике команданың берсе дә күпчелектә гол кертмәде. Уналтынчы минутта Артём Галимов гол кертте (7:2).
Командалар составы:
«Ак Барс»
- Билалов (Мифтахов);
- Барабанов – Сафонов – Галимов, Лямкин – Марченко;
- Петан – Семёнов – Яшкин, Фальковский – Миллер;
- Пустоёров – О’Делл – Коршков, Яруллин – Лучевников;
- Дыняк – Кателевский – Кошелев (Җамалтдинов), Ст.Терехов.
«Автомобилист»
- Галкин (Аликин);
- Обидин – Да Коста – Голышев, Трямкин – Осипов;
- Кизимов – Шаров – Мэйсек, Воробьёв – Диц;
- Хрипунов – Бывалцев – Меркли, Зборовский – Кашников;
- Шашков – Романцев – Каштанов, Ишимников – Эберт.
Киләсе уен Екатеринбургта узачак. «Автомобилист» – «Ак Барс» матчы 3 апрель көнне 17:00 сәгатьтә башлана.
Свежие комментарии