Бакудагы Насыйри институты үзәге методисты Азәрбайҗанда татар теле үсеше турында сөйләде

Бакудагы Каюм Насыйри институты мәдәни-мәгариф үзәгендә даими рәвештә 20гә якын кеше шөгыльләнә, катнашучыларның яше 7 яшьтән 83 яшькә кадәр. Бу хакта үзәкнең методисты Эльмира Юсифли сөйләде. «Без татар теле күнекмәләрен уен һәм аралашу аша тәрбияләргә тырышабыз», - ди методист.

Телне өйрәтү методикасының үзенчәлеге уртак төрки тамырлы татар һәм азәрбайҗан телләрен чагыштырудан гыйбарәт.

«Тикшерә һәм чагыштыра башлагач, барысы да татар һәм азәрбайҗан телләрен үзе өчен яңадан ача һәм бу телләрне бертигез ярата», - дип ассызыклады Юсифли.

Азәрбайҗан белән Татарстан арасындагы мәдәни хезмәттәшлек яңа дәрәҗәгә күтәрелә. Методист әйтүенчә, бу бигрәк тә Сабантуй кебек халыкара чаралар һәм югары дәрәҗәле затларның сәфәрләре мисалында сизелә. «Азәрбайҗан татарлары үзләренең кыйммәткә ия булуын, Казандагы һәм бөтен дөньядагы татарлар кебек үк татарлар булуын тоя, теләктәшлекне сизә», – дип билгеләп үтте Юсифли.

Үзәктә төрле юнәлешләр актив үсә, шулай ук «Бала» балалар студиясен, «Мирас» фольклор һәм йолаларны өйрәнү студиясен, «Идея» яшьләр хәрәкәтен ачу планлаштырыла. Бу Азәрбайҗан җирендә татар мәдәниятен саклау һәм үстерү өчен платформа булдыра.