Илһам Шакиров премиясендә тагын бер номинация барлыкка килергә мөмкин

Илһам Шакиров исемендәге республика премиясенә 2027 елдан тагын бер номинация өстәлергә мөмкин. ТР Министрлар Кабинетының карары проекты әлегә коррупциягә каршы экспертиза уза.

Татарстан Мәдәният министрлыгы «Халык җыры» категориясендә бүләкне ир-атларга һәм хатын-кызларга аерым бирергә тәкъдим итә. Моңа кадәр әлеге категориядә премияне бер генә җырчы ала ала иде.

Һәр лауреатка элеккечә 200 мең сум биреләчәк. Шулай итеп, премияне гомуми финанслау 600 мең сумнан 800 мең сумга кадәр артырга тиеш була.

Республика премиясе күренекле җырчы, ТАССР һәм РСФСР халык артисты Илһам Шакировның иҗат юлын дәвам итү һәм милли вокал традицияләрен саклау өчен 2020 елда булдырылды. Татарстан Республикасы Министрлар Кабинеты карары нигезендә ул ике елга бер мәртәбә тапшырыла.

Быелгы премия лауреатлары:

• хатын-кызлар арасында «Вокал» номинациясендә – РФ һәм ТР халык артисты, опера җырчысы Зилә Сөнгатуллина,
• ир-атлар арасында «Вокал» номинациясендә – ТР атказанган артисты, җырчы Артур Исламов,
• «Халык җыры» номинациясендә – ТР халык артисты, җырчы Зәйнәп Билалова һәм «Башнефть-Добыча» ҖЧҖ операторы Илшат Сибагатуллин (алар бүләкне икесенә бүлде).