Татарстан 2024 елда 3,8 миллион тоннага якын ашлык җитештерде, дип хәбәр итте Татарстан Республикасы авыл хуҗалыгы һәм азык-төлек министры урынбасары Дмитрий Яшин «Татар-информ» матбугат конференциясендә. Элегрәк «Агросәнәгать комплексы продукциясенең иминлеген һәм сыйфатын бәяләү федераль үзәге» федераль дәүләт бюджет учреждениесе җыеп алынган бөртекле культуралар 4 миллион тоннадан да ким булмаячак, дип фаразлаган иде.
813 мең тонна майлы культуралар, 2,4 миллион тонна шикәр чөгендере, 1,2 миллион тонна бәрәңге һәм яшелчәләр җыелган.
Спикер еллык ориентир булып 4,3 миллион тонна ашлык тора, диде. Республика үзе 3,3 миллион тоннага якын ашлыкны куллана.
Актив температуралар суммасы арткан – 2 мең градустан артык (уртача күрсәткечләр 1600-1800 градусны тәшкил итә).
Татарстан Республикасы Авыл хуҗалыгы һәм азык-төлек министрлыгы хисабыннан билгеле булганча, быел Татарстанның аерым районнары май аенда кырау сугуга дучар булган. Августта исә республиканың 29 районы туфракта артык дым белән очрашкан.
«Әлбәттә, ул вакытта без тулаем уңышның 10 процентын югалттык, әмма шул ук вакытта бу шикәр чөгендере, бәрәңге һәм башка яшелчәләр формалашуга уңай йогынты ясады, чөнки нәкъ менә әлеге чорда аларның тамыразыгы формалаша», — дип өстәде Яшин.
Быел чәчүлек мәйданы узган елгы мәйданнан азрак булган. Яшин сүзләренә караганда, бу язгы чорда чәчүне вакытында башкарып өлгермәү белән бәйле.
Свежие комментарии