Түбән Кама Җәмигъ мәчетендә махсус хәрби операциядә якыннарын югалткан гаиләләр белән очрашу булды. Әлеге чарада милләтенә һәм диненә бәйсез рәвештә 40тан артык кеше – тол хатыннар, солдатларның әти-әниләре һәм балалары катнашты. Очрашуны Татарстан мөфтиятенең Түбән Кама мөхтәсибәте оештырды, дип хәбәр итә Татарстан Диния нәзарәте матбугат хезмәте.
«Махсус хәрби операциядә якыннарын югалткан гаиләләр белән очрашуда Түбән Кама районы имам-мөхтәсибе Салих хәзрәт Ибраһимов, Түбән Кама шәһәре мэры урынбасары Марина Камелина, Түбән Кама районы Башкарма комитетының иҗтимагый оешмалар белән элемтә һәм милли мәсьәләләр бүлеге башлыгы Радик Шәйдуллин һәм башка җитәкчеләр бар иде», – диелә хәбәрдә.
Очрашу кысаларында Коръән-хафиз Хәлил хәзрәт Хәйбрахманов Коръән аятьләре укыды, аннары Түбән Кама мөхтәсибәтендә гуманитар ярдәм җыю өчен җаваплы булган Габделхәким хәзрәт Яруллин дога кылды.
Түбән Кама районы имам-мөхтәсибе Салих хәзрәт Ибраһимов вәгазь сөйләде. Ул билгеләп үткәнчә, нәзарәт һәм район мөхтәсибәте махсус хәрби операциядә катнашучы солдатларга һәм аларның гаиләләренә ярдәм күрсәтү буенча зур игътибар бирә: нәзарәт вәкилләреннән торган делегацияләр даими рәвештә сугыш хәрәкәтләре барган зоналарга сәфәр кыла һәм сугышчыларга гуманитар ярдәмнәр тапшырып кайта.
Аннары имам-мөхтәсиб якыннарын югалтучыларның тәкъдим-теләкләрен тыңлады. Түбән Кама мөхтәсибәте әлеге очрашуларны алга таба да үткәрергә ниятли, диелә хәбәрдә.
Свежие комментарии