Кичә, 25 апрельдә, Санкт-Петербургта ел саен үткәрелә торган «Тукай укулары» узды. Тукай скверында бөек татар шагыйре Габдулла Тукайның 139 еллыгына багышланган традицион татар шигърияте бәйрәме булды. Бу хакта Татарстан Республикасының Санкт-Петербург шәһәрендәге һәм Ленинград өлкәсендәге даими вәкиллеге хәбәр итә.
Габдулла Тукай – бөтен татар халкының тарихы һәм язмышы символы. Ул татар әдәбияты тарихына бөек шагыйрь һәм тәрҗемәче, публицист, әдәби тәнкыйтьче буларак кереп калды. Шагыйрь яңа татар әдәбиятын булдыручыларның берсе, милләтнең шигъри традициясенә нигез салучы була һәм татар телен үстерүгә зур өлеш кертә.
Тукай 30 томга якын шигырь бастыра, 9 поэма яза. Ул төрки телле әдәбият – фин-угор халыклары, татарлар, башкортлар, чувашлар әдәбияты үсешенә зур йогынты ясый.
Чара традицион рәвештә шагыйрьнең һәйкәленә чәчәкләр салу тантанасыннан башланды.
Сәламләү сүзе белән Татарстан Республикасының Даими вәкиле Шамил Шәяхмәтов, «Санкт-Петербург һәм Ленинград өлкәсе татарлар җәмгыяте» төбәкара мәдәни-агарту иҗтимагый оешмасы рәисе Рәшит Мәһдиев, Ленинград өлкәсе Татар милли-мәдәни автономиясе рәисе Айрат Маннанов чыгыш ясады.
Шигърият бәйрәмендә Габдулла Тукайның шигырьләре татар һәм рус телләрендә яңгырады. Санкт-Петербург Милләтләр йорты вәкиле, татар милли-мәдәни берләшмәләре вәкилләре, шагыйрьләр һәм иҗат эшлеклеләре чыгышларын тәкъдим итте.
Кунакларны һәм катнашучыларны шәһәрнең белем бирү учреждениеләрендә һәм иҗат берләшмәләрендә тәрбияләнүче яшь катнашучыларның чыгышлары аеруча сөендерде.
Чараны шагыйрә Халидә Гыйләҗева һәм татар җәмгыяте активисты Диләрә Йосыпова алып барды.
Санкт-Петербургта Тукай укулары инде күп еллар рәттән һәр елны үткәрелә. Чараны Татарстан Республикасының Санкт-Петербург шәһәрендәге һәм Ленинград өлкәсендәге даими вәкиллеге оештыра. Укулар һәрвакыт тарихчыларның, туган якны өйрәнүчеләрнең, иҗади интеллигенция һәм татар җәмәгатьчелеге вәкилләренең игътибарын җәлеп итә.
Свежие комментарии