Ф.Әхмәдиев исемендәге балалар сәнгать мәктәбендә Бөтендөнья татар конгрессының Балык Бистәсе муниципаль районындагы вәкиллегенең хисап-сайлау утырышы узды. Бу хакта «Авыл офыклары» сайтында хәбәр ителә.
Утырыш эшендә Татар конгрессы Башкарма комитеты җитәкчесе урынбасары Ирек Шәрипов, Балык Бистәсе районы башлыгы урынбасары Фирдания Әхмәтҗанова, районның татар теле һәм әдәбияты укытучылары, тәрбиячеләр, иҗтимагый оешма житәкчеләре, авыл җирлеге башлыклары, дин вәкилләре катнашты.
Утырыш барышында мәгариф һәм татар мәдәниятенә, теленә ярдәм инициативаларына кагылышлы төрле мәсьәләләр турында фикер алышу булды.
Утырышта катнашучыларга вәкиллекнең җитәкчесе Ильвера Касыймова тарафыннан башкарылган эшләр турында хисап тапшырылды, киләчәккә планнар билгеләнде. Шулай ук вәкиллекнең яңа составы төзелде. Татар конгрессының Балык Бистәсендәге җирле вәкиллеге җитәкчесе итеп Балык Бистәсе районы мәгариф бүлеге башлыгы Илсур Садыйков сайланды.
Свежие комментарии