12-18 мартта Ханты-Манси автономияле округында кышкы спорт төрләре буенча «Ватанны саклаучылар кубогы» була, анда Россиянең 60 төбәгеннән 300дән артык махсус хәрби операция ветераны көч сынашачак. Ярышлар программасында чаңгы узышлары, биатлон, следж-хоккей, тау чаңгысы һәм сноуборд бар. Үткәрү инициативасын Президент Владимир Путин хуплаган иде.
Статс-секретарь - Россия саклану министры урынбасары, «Ватанны саклаучылар» фонды рәисе Анна Цивилева махсус хәрби операция ветераннарын тернәкләндерүдә спортның мөһим ролен билгеләп үтте, фондның спорт башлангычларына актив ярдәм итүен дә әйтте.
Ярышларда махсус хәрби операциянең Татарстаннан 11 ветераны катнашачак. Следж-хоккейчылар командасына Динар Нургатин, Айнур Яһудин, Тимур Панченко, Сергей Соколов, Дмитрий Никитин, Сергей Веселов, Денис Дәүләткилдин, Владислав Кәлимуллин, Андрей Дурман, Алим Әхмәдиев керә.
«Чаңгы узышлары» дисциплинасында республикадан Илдар Карюков, Дмитрий Талапин һәм Анатолий Широков чыгыш ясаячак.
Хәзер көрәшчеләрнең интенсив тренировкалары уза, алар муниципаль ярышларда катнаша.
«Ватанны саклаучылар кубогы» Россия Спорт министрлыгы, Россия Паралимпия комитеты, терәк-хәрәкәт аппараты зарарланган затларның Бөтенроссия спорт федерациясе һәм төбәк хөкүмәтләре ярдәмендә «Ватанны саклаучылар» фонды тарафыннан оештырыла.
Элегрәк спортның башка төрләре буенча алты кубок үткәрелгән иде. Катнашучылар - махсус хәрби операция бурычларын үтәү барышында җәрәхәтләнгән хәрби хәрәкәтләр ветераннары ядрә белән ату, уктан ату, өстәл теннисы, пауэрлифтинг, армрестлинг һәм утырган килеш волейбол буенча ярышты.
Ярышлар «ЮграМегаСпорт» спорт объектларында уза. Катнашучыларны шулай ук мәдәни программа көтә.
Свежие комментарии