Краснодарда 27 октябрьдә Край татар мәдәнияте фестивале узды. Чараны Краснодар крае администрациясе эчке сәясәт департаменты ярдәмендә Краснодар краеның «Болгар-К» татар җәмгыяте» иҗтимагый оешмасы оештырды. Бу хакта Бөтендөнья татар конгрессы хәбәр итә.
«Һәр кешенең кече Туган җире бар, һәм ул аны сакларга һәм якларга тиеш.
Туган җирне ярату — аның тарихын, мәдәниятен, милли гореф-гадәтләрен белү дигән сүз. Бу кешеләрне теге яки бу халыкка каравы белән горурланырга мәҗбүр итә. Шуңа күрә без туган телебезне, горурлыгыбызны сакларга тырышабыз, ата-бабаларыбызга һәм уникальлегебезгә хөрмәт күрсәтәбез. Ләкин безнең халыкның, безнең шәһәрнең төп байлыгы – ул кешеләр!» - дип ачып җибәрде фестивальне татар җәмгыяте рәисе урынбасары Рида Колотова.Сәламләү сүзе белән мөхтәрәм кунаклар – Краснодар крае администрациясе эчке сәясәт департаменты киңәшчесе Наталья Григорова, Краснодар крае Россия халыклары ассамблеясе гомумроссия иҗтимагый-дәүләт оешмасының төбәк бүлеге рәисе Василий Чанба, Краснодар крае һәм Адыгея Республикасы милли-мәдәни иҗтимагый берләшмәләре вәкилләре чыгыш ясады.
Иҗат коллективларының матур чыгышлары, күңелле татар җырлары һәм дәртле биюләр фестиваль кунакларын татар халкы мәдәниятенең күптөрлелеге белән таныштырды, диелә хәбәрдә.
Свежие комментарии