<p>Бардада Советлар Союзы Герое Муса Җәлил исемендәге сквер ачылды, анда ук каһарман-шагыйрьгә бюст куелган.</p> <p>Тантана XIV Бөтенроссия авыл Сабантуе кысаларында узды. Ачылышта Татарстан Республикасы Премьер-министры урынбасары, Бөтендөнья татар конгрессының Милли шурасы рәисе <strong>Васил Шәйхразыев</strong> катнашты.
Ул 2024 елның Россия Президенты <strong>Владимир Путин </strong>тарафыннан Гаилә елы, ә Милли шура тарафыннан Шәхесләр елы дип игълан ителүен искәртте. «Гаилә, шәхес дигәндә, Муса Җәлил кыл уртага басып куя», – диде ул.</p> <p>Милли шура рәисе күп кенә илләрдә, шәһәрләрдә Муса Җәлилгә ачылган бюстларның скульпторы Санкт-Петербургтан<strong> Венера Абдуллина </strong>булуын әйтте.</p> <p>«Әбиләр: «Сугыш кына була күрмәсен, балалар», – ди иде. «Әби, нинди сугышлар инде, нинди дөньяда яшибез», – ди идек. Килеп җиттек махсус хәрби орепациягә. Җәлилләр кебек егетләребез илне сакларга бара. Яшьләр үз вакытында Җәлилләр кебек, корал тотып, илне сакларга әзерме! Әзер. Әби-бабалар ягыннан, ислам диненә таянып, дөрес тәрбия алалар», – дип сөйләде ул.</p> <p> <img alt="" height="961" src="https://tatar-inform.tatar/images/uploads/ca9261a63aa12d664bd9f05369067e0c.jpg" width="828" /></p> <p>Пермь крае губернаторы администрациясе җитәкчесенең беренче урынбасары <strong>Леонид Политов</strong> һәйкәлнең Бардада ачылуы очраклы булмавын әйтте.</p> <p>«Аның тормышы авыр, әмма хәтердә калырлык булган. Муса Җәлил тормыш юлы үсеп килүче буын өчен үрнәк. Батырлык, илгә мәхәббәт үрнәге. Барда патриотлар җире, бу һәйкәл монда ачылу очраклы хәл түгел», – диде ул.</p> <p>Барда районы җитәкчесе <strong>Хәлил Алапанов</strong> Пермь крае губернаторы, Татарстан Республикасы рәисенә рәхмәтләрен җиткерде. «Киләчәк буын өчен геройларыбыз үрнәк булып торачак. Бәйрәмнәр мөбарәк булсын», – дип сөйләде ул.</p>
Свежие комментарии