Татарстан халкына давыл кисәтүе сәбәпле куркынычсызлык чаралары турында искәрттеләр

<p>Татарстан территориясе якын көннәрдә куркыныч метеорологик күренешләр йогынтысына дучар булачак. 18 июньнең 14:00 сәгатеннән 19 июньнең 21:00 сәгатенә кадәр актив атмосфера фронтлары үткәндә яшен булуы, җилнең секундына 15-20 метрга кадәр (урыны белән секундына 24 метрга җитәргә мөмкин) көчәюе, яңгыр һәм боз явуы көтелә.

Бу хакта Татарстан Республикасының Гидрометеорология үзәге хәбәр итә.</p> <p>Давыл турында кисәтү сәбәпле Россия Гадәттән тыш хәлләр министрлыгының Татарстан Республикасы буенча Баш идарәсе халыкка тиешле куркынычсызлык чараларын күрергә киңәш итә:</p> <p>Кече судно хуҗаларына суга чыгудан тыелырга, үзләре белән коткару, элемтә һәм навигация чаралары йөртергә, берүзләренә генә балык тотмаска.</p> <p>Автотранспорт йөртүчеләргә торак пункт чикләреннән ерак юлга чыгудан тыелырга, юл хәрәкәте кагыйдәләрен катгый рәвештә үтәргә.</p> <p>Балкон һәм йорт яны территорияләреннән җилдә очып китәргә мөмкин булган ныгытылмаган әйберләрне алып куярга. Машиналарны түбә астына, агачлар янына куймаска. Җил көчәйгән очракта торак бина эченә яшеренергә.</p> <p>Яшен вакытында куркынычсызлык кагыйдәләрен үтәргә, яшен сугудан саклану өчен биек объектлардан ерак торырга.</p> <p>Яшен кайтаргычлар урнаштыру яшен разряды сугудан биналарның җимерелүе һәм януыннан сакланырга ярдәм итәчәк.</p> <p>Гадәттән тыш хәлләр министрлыгының Баш идарәсе республика халкын давыл кисәтүенә җитди карарга һәм шәхси иминлекне тәэмин итү буенча киңәшләрне үтәргә чакыра. </p>