Рөстәм Миңнеханов чәчү кампаниясен югары сыйфатлы уздыруны тәэмин итәргә кушты

Татарстанда авыл хуҗалыгы предприятиеләре һава шартлары аркасында язгы кыр эшләренә гадәттәгедән бераз иртәрәк кереште. Бу хакта ТР Рәисе Рөстәм Миңнеханов республика Хөкүмәте Йортында узган киңәшмәдә белдерде.

Ул искәрткәнчә, республика кырларында көзге культураларга ашлама кертелә, быелга план - 482 мең га, шулай ук күпьеллык үләннәргә план – 368 мең га.

«Районнарда аларны тырмалауга керештеләр, һәм якын арада сабан культураларын чәчү буенча киң күләмле эшләр башлана. Планлаштырыла торган сабан чәчүлеге мәйданы – 1 млн 630 мең га», – диде Миңнеханов.

Республика җитәкчесе ассызыклаганча, чәчү кампаниясен уздыру өчен ресурслар бар. Республика хуҗалыклары шулай ук бик күп - гектарга 73 кг минераль ашлама туплаган. Миңнеханов сүзләренчә, бу узган ел белән чагыштырганда күбрәк.

Моннан тыш, аның сүзләренчә, республиканың орлыклар белән тәэмин итү буенча да проблемалары юк.

«Техника да язгы кыр эшләренә әзер», - дип өстәде Татарстан Республикасы Рәисе.

Миңнеханов хәбәр иткәнчә, хуҗалыкларга апрель ахырына кадәр 3,2 млрд сум дәүләт ярдәме бирелә.

«Бу акча - минераль ашламаларга, яшелчә һәм бәрәңге җитештерүгә, сөт терлекчелегенә, терлекчелеккә ярдәм итүгә, бөртеклеләр җитештерүгә һәм сатуга, шулай ук башка юнәлешләргә», - диде ул.

Татарстан Рәисе ТР Авыл хуҗалыгы һәм азык-төлек министрлыгына, районнар башлыкларына, авыл хуҗалыгы предприятиеләре һәм крестьян-фермерлык хуҗалыклары җитәкчеләренә чәчү кампаниясен кыска вакыт эчендә югары сыйфатлы итеп уздыруны йөкләде. Моннан тыш, ул язгы эшләрдә катнашучы хезмәткәрләргә барлык кирәкле шартлар тудырырга һәм мондый хезмәт өчен лаеклы түләргә кушты.

«Чәчү – сроклары буенча бик катгый регламентланган. Теләсә нинди тайпылышлар, технологияне бозу - болар барысы да нәтиҗәлелеккә йогынты ясый. Шуңа күрә бу үсемлекчелек системасы өчен бик җаваплы момент», - дип билгеләп үтте республика җитәкчесе.

Моннан тыш, ул күптән түгел Казанда «Энергопром» форумы уздырылуын искәртте, анда 90 тармак компаниясе күргәзмәдә энергетика өлкәсендә инновацияләрне тәкъдим итте. Бөек Ватан сугышында Җиңүнең 80 еллыгы алдыннан энергетика ветераннарын хөрмәтләү төп вакыйга булды, диде ТР Рәисе.

Ул форумның, шулай ук Бөек Ватан сугышы чорында Татарстан энергетикларына багышланган экспозицияләрнең югары дәрәҗәдә оештырылуын билгеләп үтте.