Бүген Татарстан Рәисе Рөстәм Миңнеханов һәм Татарстан Дәүләт Киңәшчесе Минтимер Шәймиев татар шагыйре Габдулла Тукай һәйкәленә чәчәкләр салды. Бу хакта ТР Рәисе матбугат хезмәте хәбәр итә.
Тантана Казанда бөек татар шагыйре исемендәге скверда узды. Чара Туган тел көненә һәм Габдулла Тукайның 139 еллыгына багышланды.
Фото: ТР Рәисе матбугат хезмәте
Һәйкәлгә чәчәкләр кую тантанасында шулай ук ТР Дәүләт Советы Рәисе Фәрит Мөхәммәтшин, ТР Рәисе администрациясе җитәкчесе Әсгать Сәфәров, ТР мәдәният министры Ирада Әюпова, Казан мэры Илсур Метшин, республиканың иҗади интеллигенциясе вәкилләре, Габдулла Тукайның талантын хөрмәт итүчеләр катнашты.
Фото: ТР Рәисе матбугат хезмәте
Татарстан Республикасының беренче Президенты Минтимер Шәймиев татар телен үстерүгә сизелерлек өлеш кертте, ә хакимияткә Татарстан Рәисе Рөстәм Миңнеханов килү белән республиканың тел сәясәтендә яңа этап башланды. Системалы чаралардан башка татарның уникаль мәдәни мирасы кире кайтарылмаслык рәвештә юкка чыгарга мөмкин икәнен аңлап, төбәк җитәкчесе телне үстерү һәм аңа ярдәм итү өчен комплекслы программа булдырды. Татар телендә әдәбият нәшер итү, телепрограммалар һәм кинофильмнар төшерү өчен бюджет ассигнованиеләре шактый арттырылды. Яшьләрне кызыксындырырлык цифрлы контент булдыруга аерым игътибар бирелде.
Рөстәм Миңнеханов телне үстерү мәсьәләләренә шәхсән үзе зур игътибар бирә. Иҗади интеллигенция, укытучылар, студентлар белән очрашуларда ул һәрвакыт: «Татар теле – ул аралашу чарасы гына түгел, ул безнең милли үзенчәлегебезнең коды, халкыбызның күп гасырлык зирәклеген саклаучы чара», - дип ассызыклый.
Исегезгә төшерик, бүген Г. Камал исемендәге Татар дәүләт академия театрының яңа бинасында Рөстәм Миңнеханов татар театр интеллигенциясе вәкилләре белән очраша, Татарстан Республикасының Габдулла Тукай исемендәге дәүләт премияләрен тапшырачак.
Свежие комментарии