<p>Бүген Чаллы шәһәрендә Сабан туе үтә. Бәйрәмгә килгән Татарстан Дәүләт Советы Рәисе <strong>Фәрит Мөхәммәтшин</strong> шәһәр халкының хезмәттә алдынгы, тырыш булуын билгеләде.</p> <p>«Районнарда, авылларда Сабан туйлары узды, хәзер менә шәһәрләрдә хезмәт туен бәйрәм итәләр.
Эшли дә, ял да итә беләсез, чаллылылар. Сез ихтирамга лаек», — диде Фәрит Мөхәммәтшин чыгышы вакытында.</p> <figure class="image"><img alt="" height="878" src="https://tatar-inform.tatar/images/uploads/e5912f1ed5444d62f542949843debde3.jpg" width="1170" /> <figcaption> <p>Фото: © Юлай Низаев</p> </figcaption> </figure> <p>Җитәкче журналистларга интервью биргәндә, Сабантуйда авыл халкы да, шәһәрдә яшәүчеләр дә бәйрәм итүләрен ассызыклады. «Сабантуй — чын-чыннан милләтебез бәйрәме. Монда татарлар гына түгел, башка бик күп халыклар да җыела. Без үзебезнең гореф-гадәтләребезне, кунакчыллыгыбызны күрсәтәбез», — дип сөйләде ул.</p> <p>Сабантуйга тирә-як районнардан авыл хуҗалыгы тармагы хезмәтчәннәре, алдынгы механизаторлар, савымчылар чакырылган. Авыл хуҗалыгы, сәнәгать һәм җитештерү, медицина, мәдәният һәм мәгариф хезмәткәрләре мәртәбәле бүләкләргә ия булды.</p> <p>«Сабантуй гүзәле» бәйгесендә җиңүче булып Актаныштан <strong>Әминә Гаянова</strong> танылды.</p>
Свежие комментарии