18-19 октябрь көннәрендә «Алабуга» махсус икътисади зонасында беренче ярдәм күрсәтү буенча төбәк чемпионаты узды. Чараны «Алдынгылар хәрәкәте» Россия Кызыл Хач оешмасының Татарстан төбәк бүлеге ярдәме белән оештырды.
«Чемпионатның максаты – балаларда һәм яшьләрдә башка кешегә карата битараф булмау хисен тәрбияләү.
Һәркем беренче ярдәм күрсәтә белергә тиеш. Шуңа күрә проектның асылы – бу юнәлештә кызыксыну уяту һәм күбрәк катнашучыларны җәлеп итү», – дип белдерде журналистларга матбугат очрашуында Татарстан Рәисе ярдәмчесе, «Алдынгылар хәрәкәте»нең Татарстандагы бүлеге җитәкчесе Тимур Сөләйманов.
Чемпионат 2023 елдан башлап уздырыла торган Россия күләмендәге «Беренче ярдәм» проекты кысаларында үткәрелә. Проектта чемпионаттан тыш мастер-класслар, тематик дәресләр һәм 9 дәрестән торган видеокурс та каралган. Хәзерге вакытта проектта республиканың 31 районнан якынча 1,5 мең кеше катнаша.
Чемпионатның муниципаль этабы 1 октябрьдә старт ала. Анда республика районнарыннан 131 команда катнашкан. Нәтиҗәдә, 18-19 октябрь көннәрендә «Алабуга» махсус икътисади зонасында узган төбәк этабына Татарстанның 17 районыннан 39 команда үтә. Мәктәп укучылары категориясендә 30 команда (14–17 яшь), ә урта һөнәри белем алучы студентлар категориясендә 9 команда (14–25 яшь) катнаша.
«Бездә 3 практик этап булды. Төбәк этабында бары тик практик күнегүләр генә, ә бөтен теория муниципаль этапта үткәрелгән иде. Беренче этап – йөрәк-үпкә реанимациясе. Икенче һәм өченче этаплар – «Люстра» һәм «Самокатчы». Бу – катнашучыларга төрле ситуацияләрдә психологик ярдәм күрсәтү, кешене аңына кайтару яки кан туктату күнекмәләрен үстерергә мөмкинлек бирүче гамәли биремнәр», – дип аңлатты «Беренче ярдәм күрсәтү буенча төбәк чемпионаты» проекты җитәкчесе Наталья Пивоварова.
Беренче урынны мәктәп укучылары категориясендә Казаннан «Ангелы» һәм урта һөнәри белем алучы студентлар арасында Яшел Үзәннән «Целители» командалары ала. Җиңүчеләр 13–17 ноябрь көннәрендә Мордовия Республикасының Саранск шәһәрендә узачак беренче ярдәм күрсәтү буенча илкүләм чемпионатта да катнашачаклар.
Читайте нас:
Дзен - https://dzen.ru/tatar-inform.ru
ВК - https://vk.com/tatarinform
Телеграм - https://t.me/iatatarinform
Свежие комментарии