«Мәдәният» илкүләм проекты гамәлгә кергәннәр бирле Татарстан халкы мәдәни объектларга 40 процентка ешрак йөри башлаган. Бу хакта «Татар-информ» хәбәрчесе Александр Хевронин яза.
«Минем өчен илкүләм проектның кыйммәте яңа объектлар санында түгел, ә җәмгыятьтә мәдәниятнең ролен яңадан аңлауда. Мәдәният безнең тормышта юкка чыгып баручы ниндидер архаик тармак буларак кабул ителми башлады», – диде республиканың мәдәният министры Ирада Әюпова «Татар-информ»да матбугат очрашуында.
Аның әйтүенчә, илкүләм проект ярдәмендә илдә бу тармак бердәм юнәлештә үсеш ала башлаган.
ТР Мәдәният министрлыгы башлыгы мәгълүматлары нигезендә, Татарстанда федераль финанслау буенча дүрт яңа театр барлыкка килгән.
«Әлбәттә, киңлекне модернизацияләү һәрвакыт күпне таләп итә. Төзелештә генә түгел, учреждениеләрнең эшен оештыруда да бөтенләй яңа алым кулланылды», - дип өстәде министр.
Мисал итеп ул Казандагы Милли китапханәне атады. Иң күп килүчеләр саны күзәтелгән көннәрдә китапханәгә 8 мең кеше йөри.
«Кая да булса экскурсиягә килсәгез, сезгә начар мөнәсәбәт күрсәтсәләр, анда башка килмәячәксез. Килгән җирдә көтелгән кунак булуыңны аңлау бик мөһим. Алай да түгел, сез – хуҗалар. Дәүләт сезгә моның өчен шартлар тудыра», - дип нәтиҗә ясады Ирада Әюпова.
- Россиядә илкүләм проектлар Президент Владимир Путин указы буенча 2019 елдан гамәлгә ашырыла.
Свежие комментарии