<p>«Әлбәдән» тарихи реконструкция фестивале агымдагы елның 22-23 июнендә Татарстанның Питрәч районы Әлбәдән авылында узачак, 350дән артык катнашучы һәм 10 меңнән артык кунакны җыячак. Бу хакта республика яшьләр эшләре буенча министр урынбасары <strong>Айгөл Сабирова</strong> фестивальне уздыруга багышланган матбугат конференциясендә хәбәр итте.
</p> <p>«Матур традициягә әйләнеп баручы фестиваль инде алтынчы тапкыр Брест ныгытмасын саклауда катнашкан Советлар Союзы Герое <strong>Петр Гаврилов</strong>ның туган ягында узачак», — диде Сабирова.</p> <p>Реконструкторларның да, тамашачыларның да географиясе елдан-ел киңәя бара, дип бигеләп үтте ул. Быел исә Россиянең төрле төбәкләреннән генә түгел, башка илләрдән дә катнашучылар булачак дип көтелә.</p> <p>«Форпост» җәмәгать тәртибен саклау буенча республика яшьләр берләшмәсе үзәге директоры <strong>Тимур Камалетдинов</strong> ассызыклаганча, «Әлбәдән» елдан-ел киңәя, үсә һәм Брест ныгытмасының үзендә узучы фестиваль белән масштаб буенча да, оештыру дәрәҗәсе буенча да уңышлы конкурентлаша.</p> <p>Ул шулай ук быел фестивальдә катнашачак техника саны артачагын әйтте. Барлыгы 15 берәмлек тарихи бронетехника җәлеп ителәчәк. Бу узган ел белән чагыштырганда өчкә күбрәк.</p> <p>Хәзерге вакытта Һава транспорты федераль агентлыгы (Росавиация) белән фестивальдә самолетлар куллану мәсьәләсе буенча фикер алышу бара, әмма алар булырмы-юкмы – әлегә билгеле түгел, дип уртаклашты фестивальнең оештыручысы <strong>Наилә Таҗиева</strong>.</p> <p>Таҗиева быел фестивальдә Россиянең төрле шәһәрләреннән тарихи мәйданчыклар күбрәк булачак, шулай ук лекцияләр һәм уникаль медицина инструментлары коллекциясе белән тарихчы лектор Александр Поволодский киләчәк, дип өстәде.</p>
Свежие комментарии