Санитар-экологик икеайлык башланганнан бирле Татарстанда 551 хокук бозу очрагы ачыкланган, 87 кисәтү ясалган. Бу хакта бүген Казанда брифингта ТР Экология һәм табигать ресурслары министрының беренче урынбасары – әйләнә-тирә мохитне саклау өлкәсендә баш дәүләт инспекторы Илнур Гобәйдуллин хәбәр итте.
Ул билгеләп үткәнчә, экологлар хокук бозуларны һавадан күзәтү вакытнда да ачыклаган.
Хокук бозуларны беренче авиаочышлар үткәреп теркәгәннәр.«3 апрельдә Питрәч, Мамадыш, Алабуга, Менделеевск, Минзәлә, Зәй, Түбән Кама, Балык Бистәсе районнары һәм Чаллы шәһәре тикшерелде. Табигатьне саклау законнарын бозуның 150 төрле очрагы ачыкланган», - дип хәбәр итте Гобәйдуллин.
16 апрельгә шулай ук авиаочыш планлаштырылган. Һавадан республиканың көньяк-көнчыгыш зонасын тикшерәчәкләр.
« Татарстан Рәисе Рөстәм Миңнеханов кушуы буенча 9 майга барысы да ялтырап торырга тиеш, барысы да җыештырылырга тиеш», — дип ассызыклады Гобәйдуллин.
Искәртик, быел Россиядә Бөек Ватан сугышында Җиңүнең 80 еллыгы билгеләп үтелә. Шулай ук РФ Президенты Владимир Путин карары белән 2025 ел - Ватанны саклаучылар елы дип игълан ителде. Күптән түгел Миңнеханов шулай ук сугыш ветераннарына бүләкләр тапшырды.
Свежие комментарии