Бөгелмәдә Бөек Ватан сугышында Җиңүнең 80 еллыгын бәйрәм итүгә актив әзерлек бара. Иң мөһим бурычларның берсе - сугыш геройларына багышланган мемориаль комплексларны тәртипкә китерү.
Район башлыгы Линар Закиров чираттагы тапкыр төзелеш объектларын караганда шәһәр һәйкәлләрендә булды, подрядчылар белән очрашты, алда торган ремонт эшләренең масштабы турында фикер алышты.
«Истәлек стелалары солдатларның һәм тыл хезмәтчәннәренең батырлыгына багышланган, ветераннар һәм шәһәр халкы алдындагы бурычыбыз – аларны бөгелмәлеләрнең киләчәк буыннары өчен лаеклы саклау. 1 майга барлык һәйкәлләрне тәртипкә китерергә кирәк», - диде Линар Закиров.
Кызыл Армия урамында парктагы мемориалда гранит плитәләрен һәм тротуар плитәләрен торгызу ремонты башкарылачак. 352нче Оршан дивизиясе батырлыгы хөрмәтенә мемориаль комплекста подряд оешмасы брусчаткаларны тулысынча алыштырачак, баскычларны һәм клумбаларның ян өлешләрен реставрацияләячәк.
Мәңгелек Дан мемориалында косметик ремонт ясалачак. Эшкә киләсе атнада керешәчәкләр.
Быел Россиядә Бөек Ватан сугышында Җиңүнең 80 еллыгы билгеләп үтелә. Шулай ук РФ Президенты Владимир Путин карары буенча 2025 ел Ватанны саклаучылар елы дип игълан ителде.
Фото: ТР Бөгелмә районы матбугат хезмәте
Свежие комментарии