Татарстанның 26 районында һәм шәһәрендә язгы каникул вакытында 285 лагерь эшләгән, аларда 20 меңнән артык бала һәм яшүсмер ял иткән. Бу хакта ТР Яшьләр эшләре министрлыгының матбугат хезмәте хәбәр итә.
Республика мәктәп яны лагерьлары һәм учреждениеләреннән тыш, балалар Марий Эльда һәм Кырымда булды.
Татарстан яшьләр эшләре министры Ринат Садыйков белдергәнчә, язгы каникул балалар өчен бер елга планлаштырылган гомуми сәламәтләндерү программасының мөһим өлеше булып тора. Аның сүзләренчә, оештыручыларның төп бурычы - имин ял итү. Шул ук вакытта эчтәлекле программага аерым игътибар бирелә. Лагерьларда гражданлык-патриотик, мәгълүмати-технологик, физкультура-спорт, лингвистик һәм социаль-педагогик юнәлештәге сменалар үткәрелде. Ватанны саклаучылар елына һәм Җиңүнең 80 еллыгына багышланган чараларга аерым басым ясалды.
Республиканың барлык лагерьларында Бердәм гамәлләр көннәре оештырылды, алар кысаларында тематик чаралар узды. Мисал өчен, «Костер» республика яшьләр үзәгендә ял иткән яшүсмерләр Бөтендөнья театр көне уңаеннан «Созвездие-Йолдызлык» театрында «Җиңү юллары» спектаклен карады.
Республикада «Солдатка хат» акциясе узды, аның кысаларында балалар хәрбиләргә хатлар язды. Моннан тыш, Бөек Ватан сугышы турында фильмнар карау оештырылды.
Свежие комментарии