<p>Бүген мөселманнар өчен иң мөһим бәйрәмнәрнең берсе – Корбан гаете. Татарстан Республикасы мөфтиенең беренче урынбасары, «Кол Шәриф» мәчете имам-хатыйбы<strong> Илфар хәзрәт Хәсәнов </strong>гает вәгазен һәм намазын Әлмәт шәһәренең яңартылган Ризаэтдин Фәхретдин исемендәге Үзәк мәчетендә укыды.
Вәгазендә ул хәзерге җәмгыятнең төп проблемасы – гаиләләр таркалу темасын күтәрде.</p> <p>«Гаиләләр таркалу – татар өммәтенең һәм, гомумән, хәзерге җәмгыятнең бер чире ул. Гаилә – Аллаһыбыздан фани дөньяда бирелгән иң бөек рәхмәтләренең берсе. Дәүләт тарафыннан да гаилә саклансын өчен күп эшләр эшләнә, әмма статистикага караганда никахланучыларның яртысыннан артыгы аерылыша», – диде ул.</p> <p>Илфар хәзрәт аерылышуның төп сәбәпләрен дә атады: беренчедән – акча җитмәү, икенчедән – характерлар туры килмәү. Вәгазендә ул әлеге проблемаларның ни сәбәпле тууын һәм гаиләнең нык булуы өчен нишләргә кирәклеген дә аңлатты.</p> <p>«Аерылушыларның асыл сәбәбе акча җитмәүдә түгел, ә рухи кыйммәтләр җитмәүдән. Ир үзенең гаиләсе алдында бурычларын үтәсә, хатын иренә киңәшче һәм фикердәшче булса һәм алар икесе дә тәкъвалы кешеләр булса – шул чакта гаилә нык булыр. Гаиләне тәэмин итү өчен ирләр җавап бирсә, ә гаиләдәге тынычлык, үзара аңлашу һәм, киресенчә, тавыш чыгу – хатыннардан. Гаиләнең иминлеге хатын-кызның тыңлаучан булуыннан тора», – дип, аңлатты Илфар хәзрәт.</p> <p> </p>
Свежие комментарии